ЭФЭСЯНАЎ 3 - Біблія (пераклад В. Сёмухі)

Эф 3

¹ Вось дзеля гэтага я, Павал, стаўся вязьнем Ісуса Хрыста за вас, язычнікаў.

² Бо вы, пэўна, чулі пра служэньне мілаты Божай, дадзенай мне для вас,

³ таму што мне праз адкрыцьцё абвешчана таямніца, - пра што я і вышэй коратка пісаў, -

⁴ дык вы, чытаючы, можаце ўведаць маё разуменьне таямніцы Хрыстовай,

⁵ якая ня была абвешчана ранейшым пакаленьням сыноў чалавечых, як сёньня адкрыта сьвятым апосталам Ягоным і прарокам праз Духа (Сьвятога),

⁶ каб і язычнікі былі супольнымі спадчыньнікамі, што складаюць адно цела, і саўдзельнікамі абяцаньня Ягонага ў Хрысьце Ісусе праз зьвеставаньне,

⁷ слугою якога зрабіўся я пасьля дараваньня мілаты Божай, дадзенай мне дзеяньнем сілы Ягонай.

⁸ Мне, самаму найменшаму з усіх сьвятых, дадзена мілата гэтая - зьвеставаць язычнікам недасьледнае багацьце Хрыстовае

⁹ і адкрыць усім, што ёсьць зьдзяйсьненьне таямніцы, схаванай ад вечнасьці ў Богу, Які стварыў усё Ісусам Хрыстом,

¹⁰ каб цяпер была вядомая праз Царкву начальству і ўладам на нябёсах бясконцая мудрасьць Божая,

¹¹ паводле спрадвечнага вызначэньня, якое Ён учыніў у Ісусе Хрысьце, Госпадзе нашым,

¹² у Якім мы маем адвагу і надзейны доступ празь веру ў Яго.

¹³ А таму прашу (вас) не маркоціцца духам ад маіх дзеля вас журботаў, бо яны - ваша слава.

¹⁴ Дзеля гэтага схіляю калені мае прад Айцом Госпада нашага Ісуса Хрыста,

¹⁵ ад Якога мае найменьне ўсякая айчыннасьць на нябёсах і на зямлі,

¹⁶ хай дасьць вам, па багацьці славы Сваёй, моцна ўцьвердзіцца Духам Ягоным ва ўнутраным чалавеку,

¹⁷ каб Хрыстос вераю ўсяліўся ў сэрцы вашыя,

¹⁸ каб вы, укарэненыя і ўцьверджаныя ў любові, маглі спасьцігнуць з усімі сьвятымі, што ёсьць шырыня і даўжыня, і глыбіня і вышыня,

¹⁹ і ўразумець вышэйшую за ўразуменьне любоў Хрыстовую, каб вам напоўніцца ўсёю поўніцаю Божаю.

²⁰ А Таму, Хто сілаю, якая дзее ў нас, можа зрабіць непараўнена болей за ўсё, чаго мы просім, альбо пра што думаем,

²¹ Таму слава ў Царкве ў Хрысьце ва ўсе роды, ад веку да веку. Амін.