ЭКЛЕЗІЯСТА 6 - Біблія (пераклад В. Сёмухі)

Экл 6

¹ Ёсьць зло, якое я ўбачыў пад сонцам, і багата яго між людзьмі:

² Бог дае чалавеку багацьце, і маёмасьць, і славу, і душы ягонай ніякай нястачы няма ані ў чым, чаго зажадае; ды ня даў яму Бог карыстацца з таго, а чужы чалавек спажывае: гэта - марнасьць і ліхая нядоля!

³ Калі б сотню дзяцей напладзіў чалавек і пражыў шмат гадоў і памножыліся дні яго веку, а душа яго ўцехі ня мела б з дабротаў і каб ня было яму і пахаваньня, я сказаў бы: неданосак шчасьлівейшы за яго,

⁴ бо дарма ён прыйшоў і ў цемру сышоў, і імя яго ўкрылася змрокам:

⁵ ані сонца ня бачыў і не спазнаў: яму спакайней, чым таму.

⁶ А той, хоць пражыў бы дзьве тысячы год і не насыціўся б дабром, ці ж не ў адно і тое месца ідзе?

⁷ Уся праца людская - для рота, а душа чалавека - не насычаецца.

⁸ Якая ж перавага ў мудрага над неразумным, якая - у гаротніка, што ўмее хадзіць, над тымі, што жывуць?

⁹ Лепей бачыць вачыма, чым душою блукаць. А гэта - таксама марнасьць і пагоня за ветрам!

¹⁰ Што існуе, таму дадзена ўжо найменьне, і вядома, што гэта - чалавек і што ня можа ён прававацца з тымі, якія мацнейшыя за яго.

¹¹ Шмат ёсьць такога, што памнажае марнасьць: што ж чалавеку лепей?

¹² Бо хто ведае, што чалавеку добра ў жыцьці, у безьлічы дзён марнага веку яго, якія праходзяць, бы цень? І хто чалавеку скажа, што будзе пад сонцам пасьля яго?