ПСАЛТЫР 87 - Біблія (пераклад В. Сёмухі)

Пс 87

¹ Песьня. Псальма. Сыноў Карэевых. Кіроўцу хору на Махалат, для сьпяваньня. Вучэньне Этана Эзрахіта.

² Госпадзе, Божа ратунку майго! удзень лямантую і ўначы прад Табою.

³ Хай дойдзе малітва мая прад аблічча Тваё; нахілі вуха Тваё да маленьня майго.

⁴ Бо душа мая насыцілася немарасьцямі, і жыцьцё маё наблізілася да апраметнай.

⁵ Я дараўнаўся да тых, што ў магілу сыходзяць; я стаў, як чалавек бязь сілы,

⁶ паміж мёртвымі кінуты, - як забітыя, што ляжаць у магіле, пра якіх Ты больш не ўспамінаеш і якія ад рукі Тваёй адкінутыя.

⁷ Ты паклаў мяне ў дол апраметны, у морак, у бездань.

⁸ Легла на мяне лютасьць Твая, і ўсімі хвалямі Тваімі Ты пабіў мяне.

⁹ Ты адвёў ад мяне знаёмых маіх, зрабіў мяне агідным для іх; я ўвязьнены і не магу выйсьці.

¹⁰ Вока маё ад гароты стамілася; цэлы дзень я клікаў Цябе, Госпадзе; працягваў рукі свае да Цябе.

¹¹ Хіба над мёртвымі ўчыніш Ты цуд? Хіба мёртвыя ўстануць і будуць славіць Цябе?

¹² Альбо ў магіле будзе абвяшчацца ласка Твая, і праўда Твая - у месцы тленьня?

¹³ Хіба ж у мораку спазнаюцца дзівосы Твае, і ў зямлі забыцьця - праўда Твая?

¹⁴ але я Цябе, Госпадзе, клічу, і рана раніцай малітва мая сустракае Цябе.

¹⁵ Навошта, Госпадзе, адкідаеш душу маю, хаваеш аблічча Тваё ад мяне?

¹⁶ Я няшчасны і парахнею зь дзяцінства; нясу жахі Твае, і зьнемагаю.

¹⁷ Над мною прайшла лютасьць Твая; страхоцьці Твае зламалі мяне,

¹⁸ кожны дзень абступаюць мяне, як вада: аблягаюць мяне ўсе разам.

¹⁹ Ты аддаліў ад мяне сябра і блізкага; знаёмых маіх ня відаць.