ПСАЛТЫР 76 - Біблія (пераклад В. Сёмухі)

Пс 76

¹ Кіроўцу хору Ідутумавага. Псальма Асафава.

² Голас мой да Бога, і я буду клікаць; голас мой да Бога, і Ён пачуе мяне.

³ У дзень скрухі маёй шукаю Госпада; рука мая працягнута ўначы, і не апускаецца; душа мая ня хоча суцешанай быць.

⁴ Пра Бога згадваю, і дрыжу; разважаю, і зьнемагае мой дух.

⁵ Ты не даеш мне вачэй маіх зьмежыць; я ашаломлены, і не магу гаварыць.

⁶ Разважаю пра даўнія дні, пра гады пракаветныя;

⁷ узгадваю песьні мае начныя, гутару з сэрцам маім, і выпрабоўвае дух мой:

⁸ няўжо назаўсёды адкінуў, Гасподзь, і ня будзе больш дабраволіць?

⁹ няўжо назаўсёды міласьць Яго перастала быць, і спынілася слова Ягонае з роду ў род?

¹⁰ няўжо Бог забыўся мілаваць? няўжо ў гневе спыніў шчадроты Свае?

¹¹ І сказаў я: вось гора маё - перамена правіцы Ўсявышняга.

¹² Буду ўспамінаць пра дзеі Гасподнія! буду ўспамінаць пра даўнія цуды Твае.

¹³ Буду ў кожны Твой чын заглыбляцца, разважаць пра вялікія дзеі Твае.

¹⁴ Божа! сьвятая дарога Твая. Які Бог такі вялікі, як Бог наш!

¹⁵ Ты - Бог, Які творыць цуды; Ты паказаў магутнасьць Сваю сярод народаў;

¹⁶ Ты вызваліў народ Твой рукою сыноў Якава і Язэпа.

¹⁷ Бачылі Цябе, Божа, воды, бачылі Цябе воды, і напалохаліся, і скалануліся бездані.

¹⁸ Аблокі вылівалі воды, хмары аддавалі гром, і лёталі стрэлы Твае.

¹⁹ Голас грому Твайго ў коле нябесным; маланкі асьвятлялі сьвет; зямля трэслася і скаланалася.

²⁰ Шлях Твой у моры, і сьцежка Твая ў водах вялікіх, і сьляды Твае невядомыя.

²¹ Як статак, вёў Ты народ Твой рукою Майсея і Аарона.