ПСАЛТЫР 60 - Біблія (пераклад В. Сёмухі)

Пс 60

¹ Кіроўцу хору. На струнным інструмэньце. Псальма Давідава.

² Пачуй, Божа, мой лямант, уваж малітве маёй,

³ ад краю зямлі заклікаю Цябе ў заняпаласьці сэрца майго; узьвядзі мяне на скалу, недасягальную мне,

⁴ бо Ты апора мая, Ты моцная абарона ад ворага.

⁵ Хай жыцьму я вечна ў сялібе Тваёй, і ўпакоюся пад покрывам крылаў Тваіх,

⁶ бо Ты, Божа, пачуў абяцаньні мае і даў мне спадчыну тых, хто баіцца Твайго імя.

⁷ Памнож цару дні на дні, гады падоўжы яму - з роду ў род,

⁸ няхай жыцьме ён прад Богам вечна; накажы мілажалю і праўдзе ахоўваць яго.

⁹ І я сьпяваць буду імю Твайму вечна, абяцаньні мае выконваць дзень у дзень.