ПСАЛТЫР 6 - Біблія (пераклад В. Сёмухі)

Пс 6

¹ Кіроўцу хору. На васьміструнным. Псальма Давідава.

² Ня ў ятры Тваёй выкрывай мяне, Госпадзе, і ня ў гневе Тваім карай мяне.

³ Умілажалься зь мяне, Госпадзе, бо я нямоглы; дай мне гаеньня, Госпадзе, бо косьці мае растрывожаныя,

⁴ і душа мая моцна ўстрывожаная; - а Ты, Госпадзе, дакуль?

⁵ Павярніся, Госпадзе, душу маю выратуй, уратуй мяне дзеля ласкі Тваёй,

⁶ бо ў сьмерці няма пра Цябе памятаньня: у магіле хто Цябе славіць будзе?

⁷ Стаміўся я ад зітханьняў маіх: кожнае ночы я ложак свой абмываю, сьлязьмі маімі пасьцель акрапляю маю.

⁸ Высахла ад маркоты вока маё, пастарэла яно праз маіх ворагаў.

⁹ Адступецеся ад мяне, усе ліхадзеі, бо пачуў Гасподзь голас плачу майго,

¹⁰ пачуў Гасподзь маленьне маё; Гасподзь прыме малітву маю,

¹¹ хай усе мае ворагі пасаромлены і моцна настрашыны будуць; хай вернуцца - і пасаромеюцца імгненна.