ПСАЛТЫР 47 - Біблія (пераклад В. Сёмухі)

Пс 47

¹ Песьня. Псальма сыноў Карэевых.

² Вялікі Гасподзь і праслаўлены вельмі ў горадзе Бога нашага, на сьвятой гары Ягонай.

³ Прыгожае ўзвышша, радасьць усёй зямлі гара Сіён; на паўночным схіле яе горад вялікага Цара.

⁴ Бог у харомах ягоных вядомы як цьвярдыня:

⁵ бо вось, сышліся цары і прайшлі ўсе міма;

⁶ убачылі і дзіву даліся, спалохаліся і паўцякалі:

⁷ агарнуў іх там страх і пакута, быццам боль парадзіху;

⁸ усходнім ветрам разьбіў Ты Тарсіскія караблі.

⁹ Як мы чулі, так і ўбачылі ў горадзе Госпада сілы, у горадзе Бога нашага; Бог уцьвердзіць яго навечна.

¹⁰ Разважалі мы, Божа, пра добрасьць Тваю пасярод храма Твайго.

¹¹ Як імя Тваё, Божа, так і слава Твая да краю зямлі; правіца Твая поўная праўды.

¹² Хай весяліцца гара Сіён, хай радуюцца дочкі юдэйскія дзеля судоў Тваіх, Госпадзе.

¹³ Атачэце Сіён, і абступеце яго; палічэце ягоныя вежы;

¹⁴ Зьвярнеце сэрца ваша на ўмацаваньні ягоныя; разгледзьце будынкі ягоныя, каб расказаць пакаленьню наступнаму,

¹⁵ бо гэты Бог ёсьць Бог наш на векі вечныя; Ён будзе павадыром нам да самае сьмерці.