ПСАЛТЫР 45 - Біблія (пераклад В. Сёмухі)

Пс 45

¹ Кіроўцу хору. Сыноў Карэевых. На музычным інструмэньце Аламот. Песьня.

² Бог нам прыстанішча і сіла, хуткі памочнік у нягодах.

³ Таму не ўбаімся, хоць бы зямля здрыганулася і горы рушыліся б у сэрцы мораў.

⁴ Хай шумяць, уздымаюцца воды іх, трасуцца горы ад хваляваньня іх.

⁵ Рачныя патокі весяляць горад Божы, сьвятое жытло Ўсявышняга.

⁶ Бог сярод яго; ён не пахісьнецца: Бог дапаможа яму з самае раніцы.

⁷ Зашумелі народы; пахіснуліся царствы: а Ён голас падаў Свой, і растала зямля.

⁸ Гасподзь сілы з намі, Бог Якава заступнік наш.

⁹ Прыйдзеце і пабачце дзеі Гасподнія, - якія ўчыніў Ён на зямлі спусташэньні:

¹⁰ спыняючы войны да краю зямлі, зламаў лук і струшчыў дзіду, калясьніцы спаліў вагнём.

¹¹ Спынецеся і ўведайце, што Я - Бог: буду праслаўлены сярод народаў, праслаўлены на зямлі.

¹² Гасподзь сілы з намі, заступнік наш Бог Якава.