ПСАЛТЫР 40 - Біблія (пераклад В. Сёмухі)

Пс 40

¹ Кіроўцу хору. Псальма Давідава,

² Дабрашчасны, хто дбае пра ўбогага! У дзень бедства выбавіць яго Гасподзь.

³ Гасподзь ахавае яго і жыцьцё яму зьберажэ; дабрашчасны ён на зямлі будзе. І Ты не здасі яго на волю ворагаў ягоных.

⁴ Гасподзь умацуе яго на ложку хваробы ягонай. Ты зьменіш увесь ложак ягоны ў хваробе ягонай.

⁵ Я сказаў: Госпадзе! зьлітуйся зь мяне, вылечы душу маю; бо зграшыў я прад Табою.

⁶ Ворагі мае пра мяне кажуць благое: «Калі ён памрэ, і загіне імя ягонае?»

⁷ І калі хто прыходзіць пабачыць мяне, кажа няпраўду; сэрца ягонае складае ў сабе няпраўду, і ён, выйшаўшы, гаворыць пра тое.

⁸ Усе ненавідзяць мяне, шэпчуцца паміж сабою супроць мяне, благое супроць мяне намышляюць:

⁹ «слова Веліяла прыйшло на яго; ён лёг; і болей ня ўстане».

¹⁰ Нават чалавек мірны са мною, на якога я спадзяваўся, які еў мой хлеб, падняў на мяне нагу.

¹¹ А Ты, Госпадзе, зьлітуйся зь мяне і мяне падымі, і я ім заплачу.

¹² З таго даведаюся, што Ты любіш мяне, калі вораг мой не апануе мяне,

¹³ а мяне захаваеш у цэласьці маёй і паставіш прад абліччам Тваім навечна.

¹⁴ Дабраславёны Гасподзь, Бог Ізраілеў, адвечна й навечна! Амін, амін!