ПСАЛТЫР 37 - Біблія (пераклад В. Сёмухі)

Пс 37

¹ Псальма Давідава. На ўспамін пра суботу.

² Госпадзе! ня выкрывай мяне ў гневе Тваім, і не карай мяне ў гневе Тваім,

³ бо стрэлы Твае ўпіліся ў мяне і рука Твая мяне ацяжае.

⁴ Няма цэлага месца на целе маім ад гневу Твайго; няма спакою ў костках маіх ад грахоў маіх,

⁵ бо злачынствы мае вышэй галавы, як вялікі цяжар, зьнясілілі мяне,

⁶ сьмярдзяць, гнаяцца раны мае ад безгалоўя майго.

⁷ Я сагнуты і панураны ўвесь, цэлы дзень бядуючы хаджу;

⁸ бо сьцёгны мае паліць вагонь, і няма цэлага месца ў целе маім.

⁹ Я змогся і зьнясіліўся цяжка; крычу ад пакуты сэрца майго.

¹⁰ Госпадзе! прад Табою ўсе жаданьні мае, і ўздыханьне маё ад Цябе не схаванае.

¹¹ Сэрца маё трымціць; пакінула мяне сіла мая, і сьвятло вачэй маіх - і таго няма ў мяне.

¹² Сябры мае і прыяцелі адступіліся ад няшчасьця майго, і блізкія мае далёка стаяць.

¹³ Цянёты паставілі тыя, хто пільнуе душу маю, і хто прагне мне ліха, пра пагібель маю гавораць, і намышляюць штодзень мне благое;

¹⁴ а я, як глухі, ня чую, і як нямко, што вуснаў сваіх не растуляе;

¹⁵ і стаў я, як чалавек, што ня чуе і ня мае ў вуснах сваіх адказу,

¹⁶ бо на Цябе, Госпадзе, спадзяюся я; Ты пачуеш, Госпадзе, Божа мой.

¹⁷ І сказаў я: няхай не падымуцца нада мною мае ворагі; калі дрыжыць нага мая, хай ня ўзносяцца яны нада мною.

¹⁸ Я да ўпадку гатовы, і скруха мая заўжды перада мною.

¹⁹ Беззаконьне сваё я ўсьведамляю; і ўбольваюся ў грэху маім.

²⁰ А мае ворагі жывуць і мацуюцца, і памнажаюцца тыя, што ненавідзяць мяне, невінаватага;

²¹ і тыя, што плацяць мне злом за дабро, ваююць супроць мяне, бо я за добрым іду.

²² Не пакінь мяне, Госпадзе Божа мой! не адыходзь ад мяне;

²³ пасьпяшайся на дапамогу мне, Госпадзе, Збаўца мой!