ПСАЛТЫР 32 - Біблія (пераклад В. Сёмухі)

Пс 32

¹ Псальма Давідава. Радуйцеся, праведнікі, у Госпадзе: шчырым прыстоіць хваліць!

² Услаўляйце Госпада арфамі, сьпявайце Яму на дзесяціструннай псалтыры;

³ новую песьню сьпявайце Яму; зладжана пойце Яму, з ускліцаньнем,

⁴ бо слова Гасподняе - шчырае, і ўсе дзеі Ягоныя правільныя.

⁵ Ён любіць праўду і суд; Гасподняю міласьцю зямля поўніцца.

⁶ Словам Госпада створаны нябёсы, і духам вуснаў Ягоных - усе сілы нябесныя.

⁷ Ён сабраў, быццам груды, марскія воды; бездані склаў у каморах.

⁸ Хай баіцца Госпада ўся зямля; хай трымціць прад Ім усё жывое на сьвеце,

⁹ бо сказаў Ён - і сталася; Ён загадаў - і зьявілася.

¹⁰ Гасподзь разбурае рады язычнікаў; зьнішчае намыслы народаў.

¹¹ А рада Гасподняя вечна стаяцьме; задумы сэрца Ягонага - з роду ў род.

¹² Дабрашчасны народ, у якога Гасподзь ёсьць Бог, - племя, якое Ён выбраў у спадчыну Сабе.

¹³ Гасподзь паглядае зь нябёсаў, бачыць усіх сыноў чалавечых;

¹⁴ з трона Свайго Ён пазірае на ўсіх, што жывуць на зямлі:

¹⁵ Ён стварыў сэрцы ўсіх іх, і ўважае ўсім іхнім дзеям.

¹⁶ Цар не ўратуецца мноствам войска; не ўбароніць волата вялікая сіла.

¹⁷ Ненадзейны конь для ратаваньня, ня вызваліць сілай вялікай сваёю.

¹⁸ Вось, вока Гасподняе над тымі, хто баіцца Яго, і хто спадзяецца на літасьць Ягоную,

¹⁹ што Ён душу іхнюю ўратуе ад сьмерці і ў час галодны накорміць іх.

²⁰ Душа наша мае надзею на Госпада: Ён дапамога наша;

²¹ Ім радуецца сэрца наша, бо на сьвятое імя Ягонае мы спадзяваліся.

²² Хай будзе ласка Твая, Госпадзе, з намі, мы так на Цябе надзею ўскладаем.