ПСАЛТЫР 28 - Біблія (пераклад В. Сёмухі)

Пс 28

¹ Псальма Давідава. Напрыканцы сьвята Кучак. Аддайце Госпаду, сыны Божыя, аддайце Госпаду славу і чту,

² аддайце Госпаду славу імя Ягонага; пакланецеся Госпаду ў пышнай сьвятасьці Ягонай.

³ Голас Гасподні над водамі, Бог славы загрымеў, Гасподзь над вялікімі водамі.

⁴ Голас Гасподні моцны; голас Гасподні велічны.

⁵ Голас Гасподні ламае кедры; Гасподзь ламае кедры Ліванскія

⁶ і прымушае іх скакаць, як цялят, Ліван і Сірыён - як маладога аднарога.

⁷ Голас Гасподні выкрасае полымя вогненнае.

⁸ Голас Гасподні трасе пустыню; трасе Гасподзь пустыню Кадэс.

⁹ Голас Гасподні прымушае касуль каціцца, і агаляе лясы; і ў храме Ягоным абвяшчае пра славу Ягоную.

¹⁰ Гасподзь сядзеў над патопам, і сядзецьме Гасподзь царом вечна.

¹¹ Гасподзь дасьць сілу народу Свайму; Гасподзь дабраславіць народ Свой мірам.