ПСАЛТЫР 15 - Біблія (пераклад В. Сёмухі)

Пс 15

¹ Залатая песьня Давідава. Барані мяне, Божа; бо я на Цябе спадзяюся.

² Я сказаў Госпаду: Ты Гасподзь мой; даброты мае Табе не патрэбныя.

³ Да сьвятых на зямлі і да дзівосных Тваіх - да іх уся зычлівасьць мая.

⁴ Хай памножацца смуткі ў тых, што цякуць да бога чужога; я ня вылью крывавых ахвяраў іхніх, і не спамяну іх імёнаў вуснамі маімі.

⁵ Гасподзь - частка спадчыны маёй і чары маёй. Ты трымаеш долю маю.

⁶ Межы мае прайшлі па цудоўных мясьцінах, і спадчына мая мне прыемная.

⁷ Дабраслаўлю Госпада, Які навучыў мяне; нават і ноччу ўшчувае мяне нутрына мая.

⁸ Заўсёды перад сабою я Госпада бачыў, бо Ён праваруч мяне; не пахіснуся.

⁹ Таму ўзрадавалася сэрца маё; і ўзьвесяліўся мой язык; нават і цела маё супакоіцца ў спадзяваньні;

¹⁰ бо Ты не пакінеш душы мае ў пекле і не дасі сьвятому Твайму ўбачыць тленьне.

¹¹ Ты пакажаш мне шлях жыцьцёвы: паўната радасьці прад абліччам Тваім, шчасьце ў правіцы Тваёй навечна.