ПСАЛТЫР 149 - Біблія (пераклад В. Сёмухі)

Пс 149

¹ Алілуя. Сьпявайце Госпаду песьню новую; слава Яму на сходні сьвятых.

² Хай радуецца Ізраіль за Творцу свайго; сыны Сіёна хай радуюцца за Цара свайго.

³ Хай хваляць імя Ягонае скокамі; на тымпане і арфе хай сьпяваюць Яму,

⁴ бо дабраволіць Гасподзь народу Свайму, праслаўляе пакорных ратункам.

⁵ Хай радуюцца сьвятыя ў славе, хай сьпяваюць на ложках сваіх.

⁶ Хай будуць праслаўленьні Богу ў іхніх вуснах, і меч двусечны ў руцэ іхняй,

⁷ каб помсьціць народам, караць плямёны,

⁸ закоўваць цароў іхніх у кайданы і вяльможаў іхніх - у путы жалезныя,

⁹ чыніць над імі суд пісаны. Гонар гэты - усім сьвятым Ягоным. Алілуя.