ПСАЛТЫР 139 - Біблія (пераклад В. Сёмухі)

Пс 139

¹ Кіроўцу хору. Псальма Давідава.

² Збаві мяне, Госпадзе, ад чалавека ліхога; ахавай мяне ад прыгнятальніка:

³ яны ліхое думаюць у сэрцы, кожны дзень на бойку ладзяцца,

⁴ яны востраць свой язык, як зьмей, яд асьпіда пад вуснамі іхнімі.

⁵ Упільнуй мяне, Госпадзе, ад рук бязбожнага, ахавай мяне ад прыгнятальнікаў, якія намысьлілі пахіснуць ногі мае.

⁶ Гардзеі паставілі на мяне пасткі і петлі, раскінулі сетку на дарозе, цянёты раскінулі на мяне.

⁷ Я сказаў Госпаду: Ты - Бог мой; пачуй, Госпадзе, голас маленьняў маіх!

⁸ Госпадзе, Госпадзе, сіла ратунку майго! Ты пакрыў галаву маю ў дзень бою.

⁹ Ня дай, Госпадзе, жаданага бязбожніку; ня дай посьпеху ліхому намыслу яго; яны заганарацца.

¹⁰ Хай пакрые галовы тых, што мяне абступілі, ліха ад іхніх жа вуснаў.

¹¹ Хай ападзе на іх распалены жар; хай будуць укінуты ў вагонь, у прорвы, каб і ня ўсталі.

¹² Чалавек злоязыкі хай ня ўмацуецца на зямлі; а ліха няхай прыгнятальніка ў пропадзь зьвядзе.

¹³ Ведаю, што Гасподзь ўчыніць суд над прыгнятальнікамі і справядлівасьць бедным.

¹⁴ Так! праведныя ўславяць імя Тваё: беззаганныя будуць жыць прад абліччам Тваім.