ПСАЛТЫР 138 - Біблія (пераклад В. Сёмухі)

Пс 138

¹ Кіроўцу хору. Псальма Давідава. Госпадзе! Ты выпрабаваў мяне і ведаеш.

² Ты ведаеш, калі я сядаю і калі ўстаю; Ты разумееш думкі мае здалёк.

³ Ці іду я, ці адпачываю, - Ты акружаеш мяне і ўсе дарогі мае Табе вядомыя.

⁴ Яшчэ слова няма на мове маёй, - Ты, Госпадзе, ужо ведаеш яго дасканала.

⁵ Ззаду і сьпераду атачыў Ты мяне і кладзеш на мяне руку Тваю.

⁶ Дзіўнае мне Тваё веданьне - высока, дасягнуць яго не магу!

⁷ Куды пайду ад Духа Твайго, ад аблічча Твайго куды ўцяку?

⁸ Ці на неба ўзыду - Ты там; ці сыду ў апраметную - і там Ты.

⁹ Ці вазьму крылы золку і перасялюся на край мора, -

¹⁰ і там рука Твая мяне павядзе, і ўтрымае мяне правіца Твая.

¹¹ Ці скажу: можа, цемра ўкрые мяне, і сьвятло навокал мяне зробіцца ноччу;

¹² але і цемра Цябе ад мяне не зацемрыць, і ноч сьветлая, быццам дзень; як цемра, так і сьвятло.

¹³ Бо Ты ўладзіў вантробы мае і выткаў мяне ў чэраве маці маёй.

¹⁴ Слаўлю Цябе, бо я дзівосна зладжаны. Дзівосныя дзеі Твае, і душа мая ўсьведамляе гэта,

¹⁵ Не схаваны былі ад Цябе косткі мае, калі мяне ў таямніцы стваралі, складалі мяне ў глыбіні нутрыны.

¹⁶ Зародак мой бачылі вочы Твае; у Тваёй кнізе запісаны ўсе дні, мне назначаныя, калі ніводнага зь іх яшчэ ня было.

¹⁷ Якія ўзьнёслыя для мяне намеры Твае, Божа, і як многа іх лікам!

¹⁸ Ці ж палічу іх, калі іх больш, чым пяску, калі прачынаюся, я ўсё Яшчэ з Табою.

¹⁹ О, калі б Ты, Божа, пабіў бязбожнага! Адыдзеце ад мяне, крыважэрныя!

²⁰ Яны гавораць супроць Цябе бязбожна; марнае намышляюць ворагі Твае.

²¹ Ці ж мне ненавідзець Тваіх ненавісьнікаў, Госпадзе, і не пагрэбаваць тымі, што паўстаюць на Цябе?

²² Поўнаю нянавісьцю ненавіджу іх; ворагі яны мне.

²³ Выпрабуй мяне, Божа, і ўведай сэрца маё; выпрабуй мяне, і ўведай намеры мае,

²⁴ і глядзі, ці дарога мая бясьпечная, і накіруй мяне на шлях вечны.