ПСАЛТЫР 135 - Біблія (пераклад В. Сёмухі)

Пс 135

¹ Алілуя. Слаўце Госпада, бо Ён добры, бо вечная ласка Яго.

² Слаўце Бога багоў, бо вечная ласка Яго.

³ Слаўце Госпада ўладароў, бо вечная ласка Яго.

⁴ Таго, Які адзін творыць цуды вялікія, бо вечная ласка Яго;

⁵ Які мудра стварыў нябёсы, бо вечная ласка Яго;

⁶ уцьвердзіў зямлю на водах, бо вечная ласка Яго;

⁷ стварыў сьвяцілы вялікія, бо вечная ласка Яго;

⁸ сонца - на кіраваньне днём, бо вечная ласка Яго;

⁹ месяц і зоркі - на кіраваньне ноччу, бо вечная ласка Яго;

¹⁰ пабіў Егіпет у першынцах ягоных, бо вечная ласка Яго;

¹¹ вывеў Ізраіля з асяродзьдзя яго, бо вечная ласка Яго;

¹² рукою моцнаю і мышцаю прасьцёртаю, бо вечная ласка Яго;

¹³ разьвёў Чэрмнае мора, бо вечная ласка Яго;

¹⁴ і правёў Ізраіля пасярод яго, бо вечная ласка Яго;

¹⁵ і скінуў фараона і войска ягонае ў Чэрмнае мора, бо вечная ласка Яго;

¹⁶ правёў народ Свой цераз пустыню, бо вечная ласка Яго;

¹⁷ пабіў цароў вялікіх, бо вечная ласка Яго;

¹⁸ і забіў цароў моцных, бо вечная ласка Яго;

¹⁹ Сігона, цара Амарэйскага, бо вечная ласка Яго;

²⁰ і Ога, цара Васанскага, бо вечная ласка Яго;

²¹ і аддаў зямлю іхнюю ў спадчыну, бо вечная ласка Яго;

²² у спадчыну Ізраілю, рабу Свайму, бо вечная ласка Яго;

²³ спамянуў нас у прыніжэньні нашым, бо вечная ласка Яго;

²⁴ і збавіў нас ад ворагаў нашых, бо вечная ласка Яго;

²⁵ ежу дае ўсякаму целу, бо вечная ласка Яго.

²⁶ Слаўце Бога нябёсаў, бо вечная ласка Яго.