ПСАЛТЫР 120 - Біблія (пераклад В. Сёмухі)

Пс 120

¹ Песьня ўзыходжаньня. Падымаю вочы мае ўгору, адкуль прыйдзе дапамога мая.

² Дапамога мая ад Госпада, Які стварыў неба й зямлю.

³ Ня дасьць Ён пахіснуцца назе тваёй, не задрэмле Той, Хто асланяе цябе:

⁴ ня дрэмле і ня сьпіць, Хто асланяе Ізраіля.

⁵ Гасподзь - ахавальнік твой; Гасподзь - шата твая з правай рукі Тваёй.

⁶ Удзень сонца цябе не заб'е, ані месяц уночы.

⁷ Гасподзь аслоніць цябе ад усякага ліха; ахавае душу тваю Гасподзь.

⁸ Гасподзь будзе ахоўваць твой выхад і ўваход ад сёньня і вечна.