ПСАЛТЫР 110 - Біблія (пераклад В. Сёмухі)

Пс 110

¹ Алілуя. Слаўлю Цябе, Госпадзе, усім сэрцам маім на радзе праведных і на сходні.

² Вялікія дзеі Гасподнія, вабныя ўсім, хто іх любіць.

³ Дзея Ягоная - слава і хараство, і праўда Ягоная застаецца навечна.

⁴ Незабыўнымі зрабіў Ён цуды Свае; літасьцівы і шчодры Гасподзь.

⁵ Ежу дае тым, хто баіцца Яго; вечна памятае Свой запавет.

⁶ Сілу дзеяў Сваіх паказаў Ён народу Свайму, каб даць яму спадчыну язычнікаў.

⁷ Дзеі рук Ягоных праўда і суд; усе Яго запаведзі правільныя,

⁸ цьвёрдыя на вякі вечныя, заснаваныя на праўдзе і слушнасьці.

⁹ Збавеньне паслаў Ён народу Свайму; наказаў навечна Свой запавет. Сьвятое і страшнае імя Ягонае!

¹⁰ Пачатак мудрасьці страх Гасподні: розум правільны ва ўсіх, хто выконвае запаведзі Ягоныя. Хвала Яму няхай будзе вечная.