ПЛАЧ 5 - Біблія (пераклад В. Сёмухі)

Плач 5

¹ Успомні, Госпадзе, што над намі зьдзейсьнілася; паглядзі, падзівіся на паганьбеньне нашае:

² спадчына нашая перайшла да чужых, дамы нашыя - да іншапляменцаў;

³ Мы асірацелі, бяз бацькі; маці нашыя - аўдавелі.

⁴ Ваду сваю п'ем за срэбра, дровы нашыя нам за грошы даюць.

⁵ Нас паганяюць у карак, мы працуем - і ня маем спачыну.

⁶ Працягваем руку да Егіпцянаў, да Асірыянаў, каб наесьціся хлеба.

⁷ Бацькі нашыя грэшнікі: іх больш няма, а мы кару нясем за беззаконьні іхнія.

⁸ Рабы пануюць над намі, і няма каму выбавіць з-пад рукі іхняй.

⁹ Свой хлеб здабываем з пагрозай жыцьцю ад меча.

¹⁰ Счарнела, як печ, нашая скура ад пякучага голаду

¹¹ Жанок на Сіёне няславяць, дзяўчат - у гарадах Юдэйскіх.

¹² Князі павешаны рукамі іхнімі, абліччы старцаў не ўшанаваны.

¹³ Юнакоў бяруць да жорнаў, і падлеткі падаюць пад ношкамі дроў.

¹⁴ Старцы не сядзяць больш каля варотаў; хлапцы не сьпяваюць.

¹⁵ Аціхла радасьць сэрца нашага: карагоды нашыя ў енк абярнуліся.

¹⁶ Упаў вянок з галавы нашай; гора нам, што мы зграшылі!

¹⁷ Ад гэтага вось зьнемаглося нашае сэрца; ад гэтага нашыя вочы зацьміліся.

¹⁸ Ад таго, што апусьцела гара Сіён, лісы ходзяць па ёй.

¹⁹ Ты, Госпадзе, жывеш вечна; трон твой - род у род.

²⁰ Дзеля чаго зусім забываеш нас, пакідаеш на доўгі час?

²¹ Навярні нас да Цябе, Госпадзе, і мы навернемся; абнаві дні нашыя, як спрадвеку было.

²² Няўжо ты зусім адкінуў нас, прагневаўся на нас бязь меры?