МАЦЬВЕЯ 26 - Біблія (пераклад В. Сёмухі)

Мц 26

¹ І сталася: калі прамовіў Ісус усе словы гэтыя, дык сказаў вучням Сваім:

² вы ведаеце, што праз два дні Пасха будзе, і Сын Чалавечы выданы будзе на крыжаваньне.

³ Тады сабраліся першасьвятары і кніжнікі і старэйшыны народу ў двор першасьвятара, якога звалі Каяфа,

⁴ і дамовіліся ўзяць Ісуса хітрасьцю і забіць;

⁵ але казалі: толькі ня ў сьвята, каб ня сталася абурэньня ў народзе.

⁶ Калі ж Ісус быў у Віфаніі, у доме Сымона пракажонага,

⁷ прыступіла да Яго жанчына з алавастравай пасудзінай міра шматкаштоўнага і ліла яму на галаву, калі Ён узьляжаў за сталом.

⁸ Убачыўшы, вучні Ягоныя абурыліся і казалі: навошта такое марнатраўства?

⁹ бо можна было б прадаць гэтае міра за вялікія грошы і даць убогім.

¹⁰ Але Ісус, зразумеўшы гэта, сказаў ім: што бянтэжыце жанчыну? Яна добры ўчынак зрабіла дзеля Мяне;

¹¹ бо заўсёды ўбогіх вы маеце пры сабе, а Мяне не заўсёды маеце;

¹² бо, выліўшы гэтае міра на Цела Маё, яна падрыхтавала Мяне да пахаваньня;

¹³ праўду кажу вам: дзе ні будзе абвешчана Дабравесьце гэтае ў цэлым сьвеце, сказана будзе ў памяць яе і пра тое, што зрабіла яна.

¹⁴ Тады адзін з дванаццацёх, якога звалі Юда Іскарыёт, пайшоў да першасьвятароў

¹⁵ і сказаў: што вы дасьце мне, і я вам выдам Яго? Яны прапанавалі яму трыццаць срэбранікаў;

¹⁶ і з таго часу ён шукаў зручнай нагоды выдаць Яго.

¹⁷ У першы ж дзень праснакоў прыступілі вучні да Ісуса і сказалі яму: дзе хочаш, каб мы прыгатавалі Табе есьці пасху?

¹⁸ Ён жа сказаў: ідзеце ў горад да такога і такога і скажэце яму: «Настаўнік кажа: час мой блізкі, у цябе ўчыню пасху з вучнямі Маімі».

¹⁹ І зрабілі вучні, як загадаў ім Ісус, і прыгатавалі пасху.

²⁰ Калі ж зьвечарэла, Ён узьлёг з дванаццацьцю вучнямі;

²¹ І калі яны елі, сказаў: праўду кажу вам, што адзін з вас выдасьць Мяне.

²² Яны вельмі засмуціліся і пачалі казаць Яму, кожны зь іх: ці ня я, Госпадзе?

²³ А Ён сказаў у адказ: хто апусьціў са Мною руку ў місу, той выдасьць Мяне;

²⁴ зрэшты, Сын Чалавечы ідзе, як пісана пра Яго; але гора таму чалавеку, якім Сын Чалавечы выдаецца: лепей было б чалавеку гэтаму не радзіцца.

²⁵ У адказ жа Юда, які выдаў Яго, сказаў: ці ня я, Равьві? Ісус кажа яму: ты сказаў.

²⁶ А калі яны елі: Ісус, узяўшы хлеб і дабраславіўшы, паламаў і, раздаючы вучням, сказаў: прымеце, ежце: гэта Цела Маё.

²⁷ І ўзяўшы чару, і падзякаваўшы, падаў ім і сказаў: пеце зь яе ўсе;

²⁸ бо гэта Кроў Мая новага запавету, за многіх праліваная дзеля дараваньня грахоў.

²⁹ Кажу ж вам, што ад сёньня ня буду піць ад плоду гэтага вінаграднага да таго дня, калі буду піць з вамі новае віно ў Царстве Айца Майго.

³⁰ І засьпяваўшы, пайшлі на гару Аліўную.

³¹ Тады кажа ім Ісус: усе вы запаняверыцеся ўва Мне ў гэтую ноч, бо напісана: «пакараю пастыра, і расьсеюцца авечкі».

³² А пасьля ўваскрэсеньня Майго сустрэну вас у Галілеі.

³³ У адказ жа Пётр сказаў Яму: калі і ўсе запаняверацца ў Табе, я не запаняверуся.

³⁴ Сказаў яму Ісус: праўду кажу табе, што гэтае ночы, перш чым засьпявае певень, тройчы адрачэшся ад Мяне.

³⁵ Кажа Яму Пётр: хоць бы прыпала мне і памерці з Табою, не адракуся ад Цябе. Падобнае і ўсе вучні казалі.

³⁶ Потым прыходзіць зь імі Ісус у мясьціну, званую Гефсіманія, і кажа вучням: пасядзеце тут, пакуль Я пайду, памалюся там.

³⁷ І ўзяўшы Пятра і абодвух сыноў Зевядзеевых, пачаў смуткаваць і журыцца.

³⁸ Тады кажа ім Ісус: душа Мая смуткуе да сьмерці; пабудзьце тут і чувайце са Мною.

³⁹ І адышоўшы крыху, упаў на аблічча Сваё, маліўся і казаў: Войча Мой! калі магчыма, хай абміне Мяне чара гэтая: але не як Я хачу, а як Ты.

⁴⁰ І прыходзіць да вучняў і застае, што яны сьпяць, і кажа Пятру: ці так не змаглі вы адну гадзіну чуваць са Мною?

⁴¹ чувайце і малецеся, каб не паддацца спакусе: дух бадзёры, а плоць нядужая.

⁴² Яшчэ, адышоўшы другі раз, маліўся, кажучы: Войча Мой! калі ня можа чара гэтая абмінуць Мяне, каб Мне ня піць яе, хай будзе воля Твая.

⁴³ І прыйшоўшы, застаў, што зноў яны сьпяць, бо ў іх вочы ацяжэлі.

⁴⁴ І пакінуўшы іх, адышоў зноў і памаліўся трэйці раз, тое самае слова сказаўшы.

⁴⁵ Тады прыходзіць да вучняў Сваіх і кажа ім: вы ўсе яшчэ сьпіце і спачываеце; вось, наблізілася гадзіна, і Сын Чалавечы аддаецца ў рукі грэшнікаў;

⁴⁶ устаньце, хадзем: вось наблізіўся той, хто прадае Мяне.

⁴⁷ І калі яшчэ гаварыў Ён, вось, Юда, адзін з дванаццацёх, прыйшоў, і зь ім мноства людзей зь мечамі і каламі, ад першасьвятароў і старэйшын народных.

⁴⁸ А хто выдаваў Яго, даў ім знак, кажучы: каго я пацалую, Той і ёсьць, вазьмеце Яго.

⁴⁹ І, адразу падышоўшы да Ісуса, сказаў: радуйся, Равьві! І пацалаваў Яго.

⁵⁰ Ісус жа сказаў яму: дружа, чаго ты прыйшоў? Тады падышлі, і паклалі рукі на Ісуса, і ўзялі Яго.

⁵¹ І вось, адзін з тых, што былі зь Ісусам, працягнуўшы руку, дастаў меч свой і, ударыўшы раба першасьвятаровага, адсек яму вуха.

⁵² Тады кажа яму Ісус: вярні меч твой у месца ягонае, бо ўсе, што возьмуць меч, ад мяча і загінуць;

⁵³ альбо думаеш, што Я не магу цяпер упрасіць Айца Майго, і Ён дасьць Мне больш за дванаццаць легіёнаў анёлаў?

⁵⁴ як жа збудуцца Пісаньні, што так павінна быць?

⁵⁵ У тую гадзіну сказаў Ісус народу: быццам на разбойніка выйшлі вы зь мечамі і каламі ўзяць Мяне; кожны дзень з вамі сядзеў Я, вучачы ў храме, і вы ня бралі Мяне.

⁵⁶ А ўсё гэта было, каб збыліся пісаньні прарокаў. Тады ўсе вучні, пакінуўшы Яго, паўцякалі.

⁵⁷ А тыя, што ўзялі Ісуса, завялі Яго да Каяфы першасьвятара, куды сабраліся кніжнікі і старэйшыны.

⁵⁸ А Пётр ішоў сьледам за Ім зводдаль, да двара першасьвятаровага і ўвайшоўшы ў сярэдзіну, сеў са слугамі, каб бачыць канец.

⁵⁹ Першасьвятары і старэйшыны і ўвесь сынедрыён шукалі ілжывага сьведчаньня супроць Ісуса, каб аддаць Яго на сьмерць;

⁶⁰ і не знаходзілі; і хоць шмат ілжывых сьведкаў прыходзіла, не знайшлі. Але нарэшце прыйшлі два лжывыя сьведкі

⁶¹ і сказалі: Ён казаў: «магу разбурыць храм Божы і за тры дні збудаваць яго».

⁶² І ўстаўшы, першасьвятар сказаў Яму: чаму нічога не адказваеш, што яны супроць Цябе сьведчаць?

⁶³ А Ісус маўчаў. І першасьвятар сказаў Яму: заклінаю Цябе Богам жывым, скажы нам, ці Ты Хрыстос, Сын Божы?

⁶⁴ Кажа яму Ісус: ты сказаў; нават маўляю вам: ад сёньня ўгледзіце Сына Чалавечага, што сядзіць праваруч сілы і ідзе на аблоках нябесных.

⁶⁵ Тады першасьвятар разадраў адзеньне сваё і сказаў: Ён блюзьнерыць. Навошта яшчэ нам сьведкі? Вось, вы чулі блюзьнерства Ягонае!

⁶⁶ Як вам здаецца? А яны сказалі ў адказ: варты сьмерці.

⁶⁷ Тады плявалі Яму ў твар і тузалі Яго; а іншыя білі па шчоках

⁶⁸ і казалі: скажы нам, Хрысьце, хто ўдарыў Цябе?

⁶⁹ А Пётр сядзеў звонку на дварэ. І падышла да яго адна служанка і сказала: і ты быў зь Ісусам Галілеянінам.

⁷⁰ Але ён адрокся перад усімі, сказаўшы: ня ведаю, што ты кажаш.

⁷¹ А калі ён выходзіў за браму, убачыла яго другая, і кажа тым, што былі там: і гэты быў зь Ісусам Назарэем.

⁷² І зноў адрокся ён, прысягнуўшы: я ня ведаю Гэтага Чалавека.

⁷³ Крыху пазьней падышлі тыя, што стаялі, і сказалі Пятру: сапраўды і ты зь іх, бо і гаворка твая выдае цябе.

⁷⁴ Тады ён пачаў прысягаць і бажыцца: я ня ведаю Гэтага Чалавека. І тут жа засьпяваў певень.

⁷⁵ І згадаў Пётр словы, сказаныя яму Ісусам: перш чым засьпявае певень, тройчы адрачэшся ад Мяне. І выйшаўшы вонкі, плакаў горка.