ГАЛЯТАЎ 6 - Біблія (пераклад В. Сёмухі)

Гал 6

¹ Браты! калі і дапусьціць чалавек якую пагрэшнасьць, вы, духоўныя, папраўляйце такога ў духу лагоды, зважаючы кожны на сябе, каб ня дацца спакусе.

² Насеце цяжары адно аднаго, і такім чынам выканаеце закон Хрыстовы.

³ Бо хто лічыць, што ён нешта такое, калі ён нішто, той ашуквае самога сябе.

⁴ Кожны няхай правярае сваю дзею, і тады мецьме пахвалу толькі ў сабе, а ня ў іншым,

⁵ бо кожны панясе свой цяжар.

⁶ Той, каго настаўляюць словам, дзяліся ўсякім дабром з тым, хто настаўляе.

⁷ Ня крывеце душою: Бог паганьбёны ня бывае. Што пасее чалавек, тое і сажне:

⁸ хто сее ў плоць сваю, ад плоці пажне прахласьць; а хто сее ў Дух, ад Духа пажне жыцьцё вечнае.

⁹ Робячы дабро, ня струджваймася: бо ў свой час пажнём, калі не аслабнем.

¹⁰ Дык вось, пакуль ёсьць час, будзем рабіць дабро ўсім, а найбольш сваім аднаверцам.

¹¹ Бачыце, як многа напісаў я вам сваёю рукою.

¹² Тыя, што хочуць хваліцца паводле цела, змушаюць вас абразацца толькі дзеля таго, каб унікнуць ганеньняў за крыж Хрыстовы,

¹³ бо і самі абрэзаныя ня трымаюцца закона, але хочуць, каб вы абразаліся, каб пахваліцца ў вашай плоці;

¹⁴ а я не хачу хваліцца, хіба толькі крыжам Госпада нашага Ісуса Хрыста, Якім для мяне сьвет укрыжаваны, а я для сьвету.

¹⁵ Бо ў Хрысьце Ісусе ня мае сілы ні абразаньне, ні неабразаньне, а новае стварэньне.

¹⁶ Тым, якія чыняць у згодзе з гэтым правілам, мір ім і міласьць, і Ізраілю Божаму.

¹⁷ У астатнім, хай ніхто не стурбуе мяне, бо я нашу раны Ісусавыя на целе маім.

¹⁸ Мілата Госпада нашага Ісуса Хрыста з духам вашым, браты. Амін.