ВЫСЛОЎІ 27 - Біблія (пераклад В. Сёмухі)

Выс 27

¹ Не хваліся заўтрашнім днём; бо ня ведаеш, што той дзень народзіць.

² Хай цябе хваліць іншы, а ня вусны твае, - чужы, а не язык твой.

³ Цяжкі камень, важкі і пясок; але гнеў неразумнага цяжэйшы за іх абодвух.

⁴ Жорсткі гнеў, неўтаймавальная лютасьць; але хто ўстоіць супроць зайздрасьці?

⁵ Лепей адкрыты дакор, чым прыхаваная любоў.

⁶ Шчырыя дакоры ад таго, хто любіць, і ілжывыя пацалункі ў таго, хто ненавідзіць.

⁷ Сытая душа топча і соты, а галоднай душы ўсё горкае - салодкае.

⁸ Як птушка, што пакінула гняздо сваё, так і чалавек, які пакінуў месца сваё.

⁹ Масьць і дымленьне радуюць сэрца; так салодкі кожнаму сябар з сардэчнай ранай сваёй.

¹⁰ Не пакідай сябра твайго і сябра бацькі твайго, і ў дом брата твайго ня ідзі ў дзень няшчасьця твайго: лепей сусед блізка, чым брат далёка.

¹¹ Будзь мудры, сыне мой, і радуй сэрца маё; і я мецьму што адказаць ліхаслоўцу майму.

¹² Разумны бачыць бяду і хаваецца; а нявопытныя ідуць наперад і прымаюць кару.

¹³ Вазьмі ў яго адзежу ягоную, бо ён паручыўся за чужога; і за чужога вазьмі ў яго заклад.

¹⁴ Хто ўголас хваліць сябра свайго з самай раніцы, таго палічаць за ліхаслоўца.

¹⁵ Бясконцы капеж у дажджлівы дзень і сварлівая жонка - роўныя;

¹⁶ хто хоча схаваць яе, той хоча ўтрымаць вецер і схапіць алей у руку сваю.

¹⁷ Жалеза жалеза вострыць, і чалавек навастрае позірк сябра свайго.

¹⁸ Хто даглядае смакоўніцу, той будзе есьці плады зь яе; і хто верна служыць гаспадару свайму, той будзе ў пашане.

¹⁹ Як у вадзе твар - да твару, так сэрца чалавека - да чалавека.

²⁰ Апраметная і Авадон - ненасытныя; ненасытныя і вочы чалавечыя.

²¹ Што плавільня - срэбру, горан - золату, тое чалавеку вусны, якія хваляць яго.

²² Таўчы неразумнага ў ступе таўкачом разам зь зернем, не адлушчыцца ад яго глупства ягонае.

²³ Добра сачы за быдлам тваім, май клопат за статкі;

²⁴ бо багацьце не навекі, ды і ўлада іхняя хіба з роду ў род?

²⁵ Рунее трава, і зьяўляецца зеляніна, і зьбіраюць горныя травы.

²⁶ Авечкі - на вопратку табе, і казлы - на закуп поля.

²⁷ І годзе казінага малака на ежу табе, на ежу хатнім тваім і на спажытак служанкам тваім.