1 ЦІМАФЕЯ 4 - Біблія (пераклад В. Сёмухі)

1 Цім 4

¹ Дух жа ясна кажа, што апошнім часам адступяцца некаторыя ад веры, слухаючы духаў спакусьнікаў і вучэньняў дэманскіх,

² праз крывадушнасьць ашуканцаў, што спалілі сумленьне сваё,

³ якія забараняюць браць шлюб і есьці тое, што Бог стварыў, каб веруючыя і тыя, што ўведалі ісьціну, елі з падзякаю.

⁴ Бо кожнае стварэньне Божае - добрасьць, і нішто ня можа асуджацца, калі прымаецца з падзякаваньнем,

⁵ бо асьвячаецца словам Божым і малітваю.

⁶ Унушаючы гэта братам, будзеш добры слуга Ісуса Хрыста, кормлены словамі веры і добрым вучэньнем, якому ты пасьледаваў.

⁷ А недарэчных і бабскіх баек цурайся, а ўдасканальвай сябе ў пабожнасьці;

⁸ бо цялеснае практыкаваньне мала карысьці дае, а пабожнасьць на ўсё прыдатная, бо мае заруку жыцьця цяперашняга і будучага.

⁹ Слова гэта слушнае і ўсякага даверу вартае.

¹⁰ Бо мы на тое і працуем і паганьбеньне церпім, што надзею маем на Бога жывога, Які ёсьць Збаўца ўсіх людзей, а найперш веруючых.

¹¹ Прапаведуй гэта і вучы.

¹² Ніхто хай не пагарджае маладосьцю тваёю; але будзь узорам веруючым у слове, у жыцьці, у любові, у духу, у веры, у чысьціні.

¹³ Пакуль ня прыйду, займайся чытаньнем, настаўленьнем, вучэньнем.

¹⁴ Не заняхайвай добраснага ў табе дару, які дадзены табе паводле прароцтва з ускладаньнем рук сьвятарства.

¹⁵ Пра гэта турбуйся, гэтага не занядбай, каб посьпех твой усім быў відавочны.

¹⁶ Пранікай у сябе і ў вучэньне, займайся гэтым пастаянна; бо, так паводзячыся, і сябе ўратуеш і слухачоў тваіх.