1 КАРЫНФЯНАЎ 1 - Біблія (пераклад В. Сёмухі)

1 Кар 1

¹ Павал, воляй Божаю пакліканы апостал Ісуса Хрыста, і Сасфэн брат,

² Царкве Божай, якая ў Карынфе, асьвечаным у Хрысьце Ісусе, пакліканым сьвятым, з усімі, хто заклікае імя Госпада нашага Ісуса Хрыста, у кожным месцы, у іх і ў нас:

³ мілата вам і мір ад Бога Айца нашага і Госпада Ісуса Хрыста.

⁴ Не перастаю дзякаваць Богу майму за вас, дзеля мілаты Божай, дадзенай вам у Хрысьце Ісусе.

⁵ Бо ў Ім вы ўзбагаціліся ўсім, усякім словам і ўсякім разуменьнем,

⁶ бо сьведчаньне Хрыстовае сьцьвердзілася ў вас,

⁷ так што вы ня маеце нястачы ні ў якім дараваньні, чакаючы зьяўленьня Госпада нашага Ісуса Хрыста,

⁸ Які і ўмацуе вас да канца, каб вам быць бязьвіннымі ў дзень Госпада нашага Ісуса Хрыста.

⁹ Верны Бог, Якім вы пакліканыя да супольнасьці з Сынам Ягоным, Ісусам Хрыстом, Госпадам нашым.

¹⁰ Малю вас, браты, імем Госпада нашага Ісуса Хрыста, каб усе вы гаварылі адно, і ня было паміж вамі падзелаў, а каб вы спалучаны былі ў адным духу і ў адных помыслах.

¹¹ Бо ад дамашніх Хлоіных сталася мне вядома пра вас, браты мае, што паміж вамі ёсьць незлагадзь.

¹² Я разумею тое, што ў вас кажуць: «я Паўлаў»; «я Апалосаў»; «я Кіфаў»; «а я Хрыстоў».

¹³ Хіба падзяліўся Хрыстос? хіба Павал крыжаваўся за вас? альбо ў імя Паўлава вы ахрысьціліся?

¹⁴ Дзякую Богу, што я нікога з вас ня хрысьціў, акрамя Крыспа і Гаія,

¹⁵ каб не сказаў хто, што я хрысьціў у імя маё.

¹⁶ Хрысьціў я таксама Сьцяпанаў дом; а ці хрысьціў я яшчэ каго, ня ведаю.

¹⁷ Бо Хрыстос паслаў мяне ня хрысьціць, а зьвеставаць, ня ў мудрасьці слова, а каб не зьнясіліць крыж Хрыстовы.

¹⁸ Бо слова пра крыж для пагібельных - юродзтва ёсьць, а нам, што ратуемся, - сіла Божая!

¹⁹ Бо напісана: «Я зьнішчу мудрасьць мудрацоў, і розум разумных адкіну».

²⁰ Дзе мудрэц? дзе кніжнік? дзе суразмоўца веку гэтага? Ці не абярнуў Бог мудрасьць сьвету гэтага ў неразумнасьць?

²¹ Бо калі сьвет сваёй мудрасьцю не спазнаў Бога ў мудрасьці Божай, дык заўгодна было Богу юродзтвам пропаведзі выратаваць веруючых.

²² Бо і Юдэі патрабуюць цудаў, і Эліны шукаюць мудрасьці;

²³ а мы прапаведуем Хрыста ўкрыжаванага, для Юдэяў камень спатыкненьня, а для Элінаў неразумнасьць,

²⁴ а для саміх пакліканых, Юдэяў і Элінаў, Хрыста, Божую сілу і Божую мудрасьць;

²⁵ бо і буянае Божае мудрэйшае за людзей, і нямоцнае Божае мацнейшае за людзей.

²⁶ Паглядзеце, браты, хто вы, закліканыя: няшмат сярод вас мудрых па плоці, няшмат моцных, няшмат высакародных;

²⁷ але Бог выбраў буянае сьвету, каб пасароміць мудрых, і нямоглае сьвету выбраў Бог, каб пасароміць моцнае;

²⁸ і бязроднае сьвету і пагарджанае і нічога ня значнае выбраў Бог, каб зьнясіліць значнае;

²⁹ на тое, каб ніякая плоць не пахвалялася перад Богам.

³⁰ Ад Яго і вы ў Хрысьце Ісусе, Які зрабіўся нам мудрасьцю ад Бога, праведнасьцю і асьвячэньнем і адкупленьнем,

³¹ каб было, як напісана: «хто хваліцца, хваліся Госпадам».