ЯНА 2 - Біблія (пераклад А.Бокуна)

Ян 2

¹ На трэці дзень было вясельле ў Кане Галілейскай, і маці Ісуса была там.

² Быў таксама запрошаны і Ісус, і вучні Ягоныя на вясельле.

³ І, як не хапіла віна, маці Ісуса кажа Яму: «Віна ня маюць».

⁴ Кажа ёй Ісус: «Што Мне і табе, жанчына? Гадзіна Мая яшчэ не прыйшла».

⁵ Гаворыць маці Ягоная слугам: «Што Ён вам скажа, зрабіце».

⁶ Было ж там шэсьць каменных глякоў, якія стаялі дзеля ачышчэньня юдэйскага і зьмяшчалі дзьве ці тры меры.

⁷ Кажа ім Ісус: «Напоўніце вадою глякі». І напоўнілі іх да верху.

⁸ І кажа ім: «Чэрпайце цяпер і нясіце да маршалка». І занесьлі.

⁹ Калі ж маршалак пакаштаваў вады, якая сталася віном, — а ён ня ведаў, адкуль яно, слугі ж, якія налівалі ваду, ведалі, — кліча жаніха

¹⁰ і кажа яму: «Кожны чалавек перш падае добрае віно, а як нап’юцца, тады горшае; ты ж добрае віно захаваў дагэтуль».

¹¹ Так зрабіў Ісус у Кане Галілейскай пачатак знакам і выявіў славу Сваю, і паверылі ў Яго вучні Ягоныя.

¹² Пасьля гэтага прыйшоў Ён у Капэрнаум, Сам і маці Ягоная, і браты Ягоныя, і вучні Ягоныя, і заставаліся там некалькі дзён.

¹³ І была блізка Пасха юдэйская, і ўзыйшоў Ісус у Ерусалім.

¹⁴ І знайшоў у сьвятыні тых, што прадавалі валоў, авечак і галубоў, і мяняльнікаў, якія там сядзелі.

¹⁵ І, зрабіўшы біч з вяровак, Ён выгнаў са сьвятыні ўсіх, а таксама авечак і валоў, і грошы мяняльнікам рассыпаў, і сталы іхнія перавярнуў;

¹⁶ і сказаў тым, што прадавалі галубоў: «Забярыце гэта адсюль і не рабіце дом Айца Майго домам гандлю».

¹⁷ І ўзгадалі вучні Ягоныя, што напісана: «Руплівасьць пра дом Твой зьядае Мяне».

¹⁸ Адказалі тады Юдэі і сказалі Яму: «Які знак пакажаш нам, што гэтак робіш?»

¹⁹ Адказаў Ісус і сказаў ім: «Зруйнуйце гэтую бажніцу, і Я ў тры дні адбудую яе».

²⁰ Сказалі тады Юдэі: «Сорак шэсьць гадоў будавалася бажніца гэтая, а Ты ў тры дні адбудуеш яе?»

²¹ А Ён гаварыў пра бажніцу цела Свайго.

²² Калі ж Ён уваскрос з мёртвых, узгадалі вучні Ягоныя, што Ён казаў гэтае, і паверылі Пісаньню і словам, якія сказаў Ісус.

²³ Калі ж Ён быў у Ерусаліме на Пасху ў сьвяты, многія паверылі ў імя Яго, бачачы знакі, якія Ён чыніў.

²⁴ Але Сам Ісус не даверыўся ім, бо ведаў усіх

²⁵ і ня меў патрэбы, каб хто сьведчыў пра чалавека, бо Ён ведаў, што было ў чалавеку.