ЯНА 17 - Біблія (пераклад А.Бокуна)

Ян 17

¹ Гэта сказаў Ісус, і падняў вочы Свае да неба, і прамовіў: «Ойча! Прыйшла гадзіна. Праслаў Сына Твайго, каб і Сын Твой праславіў Цябе,

² бо Ты даў Яму ўладу над усякім целам, каб усяму, што Ты даў Яму, Ён даў жыцьцё вечнае.

³ А гэта ёсьць жыцьцё вечнае, каб пазналі Цябе, адзінага праўдзівага Бога, і Таго, Каго Ты паслаў, — Ісуса Хрыста.

⁴ Я праславіў Цябе на зямлі, скончыў справу, якую Ты даў Мне зрабіць.

⁵ Дык цяпер праслаў Мяне Ты, Ойча, у Цябе Самога той славаю, якую Я меў у Цябе раней, чым сьвет быў.

⁶ Я зьявіў імя Тваё людзям, якіх Ты Мне даў са сьвету. Яны былі Твае, і Ты іх даў Мне, і яны захавалі слова Тваё.

⁷ Цяпер яны пазналі, што ўсё, што Ты даў Мне, гэта ад Цябе.

⁸ Бо словы, якія Ты даў Мне, Я даў ім, і яны ўзялі і сапраўды зразумелі, што Я ад Цябе зыйшоў, і паверылі, што Ты Мяне паслаў.

⁹ Я за іх прашу, не за сьвет прашу, але за тых, якіх Ты даў Мне, бо яны Твае.

¹⁰ І ўсё Маё — Тваё, і Тваё — Маё; і ў іх Я ўславіўся.

¹¹ І Я ўжо не ў сьвеце, але яны ў сьвеце, а Я да Цябе іду. Ойча сьвяты! Захавай іх у імя Тваё, тых, якіх Ты Мне даў, каб яны былі адно, як і Мы.

¹² Калі Я быў з імі ў сьвеце, Я захоўваў іх у імя Тваё; тых, якіх Ты Мне даў, Я захаваў, і ніхто з іх не загінуў, акрамя сына загубы, каб споўнілася Пісаньне.

¹³ Цяпер жа Я да Цябе іду і гэта кажу ў сьвеце, каб яны мелі радасьць Маю ў сабе поўную.

¹⁴ Я даў ім слова Тваё, і сьвет зьненавідзеў іх, бо яны не са сьвету, як і Я не са сьвету.

¹⁵ Не прашу, каб Ты ўзяў іх са сьвету, але каб захаваў іх ад зла.

¹⁶ Яны не са сьвету, як і Я не са сьвету.

¹⁷ Асьвяці іх у праўдзе Тваёй! Слова Тваё — праўда.

¹⁸ Як Ты паслаў Мяне ў сьвет, так і Я паслаў іх у сьвет.

¹⁹ І за іх Я пасьвячаю Сябе, каб і яны былі асьвечаны ў праўдзе.

²⁰ Не за іх жа толькі прашу, але і за тых, якія павераць у Мяне праз слова іх,

²¹ каб усе былі адно, як Ты, Айцец, у-ва Мне, і Я ў Табе, каб і яны былі ў Нас адно, каб паверыў сьвет, што Ты паслаў Мяне.

²² І славу, якую Ты даў Мне, Я даў ім, каб яны былі адно, як Мы адно.

²³ Я ў іх, і Ты ў-ва Мне; каб былі злучаны ў адно, і каб пазнаў сьвет, што Ты паслаў Мяне і палюбіў іх, як палюбіў Мяне.

²⁴ Ойча, тыя, якіх Ты даў Мне, хачу, каб і яны былі са Мною там, дзе Я, каб бачылі славу Маю, якую Ты даў Мне, бо Ты палюбіў Мяне раней заснаваньня сьвету.

²⁵ Ойча праведны! І сьвет Цябе не пазнаў, але Я пазнаў Цябе, і яны пазналі, што Ты паслаў Мяне.

²⁶ І Я паведаміў ім імя Тваё і паведамлю, каб любоў, якою Ты палюбіў Мяне, у іх была, і Я ў іх».