ЯНА 12 - Біблія (пераклад А.Бокуна)

Ян 12

¹ За шэсьць дзён да Пасхі прыйшоў Ісус у Бэтанію, дзе быў Лазар нябожчык, якога Ён уваскрасіў з мёртвых.

² Там прыгатавалі Яму вячэру, і Марта паслугавала, а Лазар быў адным з тых, што ўзьлягалі з Ім.

³ Марыя ж, узяўшы фунт міра нардовага, чыстага і каштоўнага, памазала ногі Ісуса і выцерла валасамі сваімі ногі Ягоныя, а дом напоўніўся водарам ад міра.

⁴ Кажа тады адзін з вучняў Ягоных, Юда Сымонаў Іскарыёт, які меўся выдаць Яго:

⁵ «Чаму не прадалі гэтае міра за трыста дынараў і не раздалі ўбогім?»

⁶ Казаў жа ён гэта не таму, што клапаціўся пра ўбогіх, але таму, што быў злодзей і меў каліту, і браў тое, што [туды] кідалі.

⁷ Ісус тады сказаў: «Пакіньце яе. Яна захавала яго на дзень пахаваньня Майго,

⁸ бо ўбогіх заўсёды маеце з сабою, а Мяне не заўсёды».

⁹ Тады вялікі натоўп з Юдэяў даведаўся, што Ён там, і прыйшлі ня толькі дзеля Ісуса, але і каб Лазара пабачыць, якога Ён уваскрасіў з мёртвых.

¹⁰ А першасьвятары пастанавілі забіць і Лазара,

¹¹ бо дзеля яго шмат Юдэяў прыходзіла і паверыла ў Ісуса.

¹² На заўтра вялікі натоўп, які прыйшоў на сьвята, пачуў, што Ісус прыходзіць у Ерусалім,

¹³ і ўзялі пальмовыя галінкі, і выйшлі на спатканьне Яму, і крычалі: «Гасанна! Дабраслаўлёны Той, Які прыходзіць у імя Госпада, Валадар Ізраіля!»

¹⁴ Ісус жа, знайшоўшы маладога асла, сеў на яго, як напісана:

¹⁵ «Ня бойся, дачка Сыёну! Вось, Валадар твой прыходзіць, седзячы на асьляняці».

¹⁶ Вучні Ягоныя перш не разу­мелі гэтага, але калі Ісус быў праслаўлены, тады яны ўзгадалі, што гэтак было напісана пра Яго і гэтак зрабілі Яму.

¹⁷ Натоўп жа, які быў з Ім, сьведчыў тады, што Ён выклікаў з магілы Лазара і ўваскрасіў яго з мёртвых.

¹⁸ Таму і пераняў Яго натоўп, бо чуў, што Ён зрабіў гэты знак.

¹⁹ Фарысэі ж гаварылі між сабою: «Глядзіце, нічога не атрымліваецца! Вось, сьвет пайшоў за Ім».

²⁰ Былі ж некаторыя Грэкі сярод тых, якія прыйшлі пакланіцца на сьвята.

²¹ Яны падыйшлі да Філіпа, які быў з Бэтсаіды Галілейскае, і прасілі яго, кажучы: «Пане, мы хочам бачыць Ісуса».

²² Філіп ідзе і кажа Андрэю; і пасьля Андрэй і Філіп кажуць Ісусу.

²³ А Ісус адказаў ім, кажучы: «Прыйшла гадзіна, каб быў праслаўлены Сын Чалавечы.

²⁴ Сапраўды, сапраўды кажу вам: калі пшанічнае зерне, упаўшы ў зямлю, не памрэ, то застанецца адно, а калі памрэ, то прыносіць шмат плоду.

²⁵ Хто любіць душу сваю, загубіць яе; а той, хто ненавідзіць душу сваю ў гэтым сьвеце, захавае яе ў жыцьцё вечнае.

²⁶ Хто Мне служыць, няхай ідзе за Мною; і дзе Я, там і служыцель Мой будзе; і хто Мне служыць, таго ўшануе Айцец.

²⁷ Цяпер душа Мая ўстрывожана; і што Я скажу? Ойча, збаў Мяне ад гэтае гадзіны; але ж дзеля гэтае гадзіны Я і прыйшоў.

²⁸ Ойча, праслаў імя Тваё!» Тады прыйшоў голас з неба: «І праславіў, і яшчэ праслаўлю».

²⁹ Натоўп, які стаяў і чуў, казаў: «Былі грымоты». Іншыя казалі: «Анёл прамовіў да Яго».

³⁰ Адказаў Ісус і сказаў: «Ня дзеля Мяне быў гэты голас, але дзеля вас.

³¹ Цяпер суд сьвету гэтаму; цяпер князь гэтага сьвету выгнаны будзе прэч.

³² І Я, калі буду падняты з зямлі, усіх прыцягну да Сябе».

³³ Сказаў жа Ён гэтае, даючы знак, якою сьмерцю мае памерці.

³⁴ Натоўп адказваў Яму: «Мы чулі з Закону, што Хрыстос застаецца вечна. Дык як жа Ты кажаш, што мусіць быць падняты Сын Чалавечы? Хто гэты Сын Чалавечы?»

³⁵ Тады сказаў ім Ісус: «Яшчэ на кароткі час сьвятло з вамі. Хадзіце, пакуль маеце сьвятло, каб цемра вас не агарнула; а хто ходзіць у цемры, той ня ведае, куды ідзе.

³⁶ Пакуль маеце сьвятло, верце ў сьвятло, каб сталіся вы сынамі сьвятла». Гэта сказаў Ісус і, адыйшоўшы, схаваўся ад іх.

³⁷ Хоць гэтулькі знакаў учыніў Ён перад імі, яны не паверылі ў Яго,

³⁸ каб споўнілася слова Ісаі прарока, якое той сказаў: «Госпадзе! Хто паверыў пачутаму ад нас, і каму было адкрытае рамяно Госпада?»

³⁹ Дзеля гэтага не маглі яны верыць, бо ізноў сказаў Ісая:

⁴⁰ «Ён засьляпіў вочы іхнія і сэрца іхняе скамяніў, каб ня ўбачылі вачыма і не зразумелі сэрцам, і не навярнуліся, каб Я аздаравіў іх».

⁴¹ Гэта сказаў Ісая, калі бачыў славу Ягоную і гаварыў пра Яго.

⁴² Аднак і з начальнікаў шмат хто паверыў у Яго, але дзеля фарысэяў не прызнаваліся, каб іх не адлучылі,

⁴³ бо яны палюбілі больш славу чалавечую, чым славу Божую.

⁴⁴ А Ісус закрычаў і сказаў: «Хто верыць у Мяне, не ў Мяне верыць, але ў Таго, Хто паслаў Мяне.

⁴⁵ І хто бачыць Мяне, бачыць Таго, Хто паслаў Мяне.

⁴⁶ Я, Сьвятло, прыйшоў у сьвет, каб кожны, хто верыць у Мяне, не застаўся ў цемры.

⁴⁷ І калі хто пачуе гэтыя словы і не паверыць, Я ня буду судзіць яго, бо Я прыйшоў не каб судзіць сьвет, але каб збавіць сьвет.

⁴⁸ Хто адкідае Мяне і не прыймае словаў Маіх, мае судзьдзю для сябе — слова, якое Я сказаў, яно будзе судзіць яго ў апошні дзень;

⁴⁹ бо Я казаў не ад Сябе, але Айцец, Які паслаў Мяне, даў Мне прыказаньне, што казаць і што гаварыць.

⁵⁰ І Я ведаю, што прыказаньне Ягонае ёсьць жыцьцё вечнае. Дык тое, што Я гавару, гавару, як сказаў Мне Айцец».