ЦІТА 3 - Біблія (пераклад А.Бокуна)

Ціт 3

¹ Нагадвай ім, каб падпарадкоўваліся і слухаліся начальнікаў і ўлады, былі падрыхтаваныя на ўсякую добрую справу,

² на нікога ня блюзьнілі, не былі ваяўнічымі, былі спагаднымі і зьяўлялі ўсякую ціхасьць адносна ўсіх людзей.

³ Бо і мы былі некалі бяздумнымі, непакорнымі, падманутымі, служачы пажаданьням і розным асалодам, жывучы ў ліхоце і зайздрасьці, былі паскуднымі, ненавідзячы адзін аднаго.

⁴ А калі зьявілася ласкавасьць і любоў да людзей Збаўцы нашага, Бога,

⁵ Ён збавіў нас ня дзеля ўчынкаў праведнасьці, якія мы ўчынілі, але паводле літасьці Сваёй, праз лазьню адраджэньня і абнаўленьня Духам Сьвятым,

⁶ Якога Ён выліў на нас шчодра праз Ісуса Хрыста, Збаўцу нашага,

⁷ каб, апраўдаўшыся ласкай Ягонай, мы сталіся праз надзею спадкаемцамі жыцьця вечнага.

⁸ Вернае слова; і я хачу, каб ты сьцьвярджаў гэта, каб тыя, што вераць Богу, былі старанныя ў выкананьні добрых справаў: гэта добра і людзям карысна.

⁹ А дурных спрэчак, і радаводаў, і сварак, і звадак адносна Закону пазьбягай, бо яны некарысныя і марныя.

¹⁰ Чалавека герэтыка пасьля першага і другога напамінаньня пакінь,

¹¹ ведаючы, што гэтакі разбэсьціўся і грашыць, асудзіўшы самога сябе.

¹² Калі пашлю да цябе Арцёма або Тыхіка, намагайся прыйсьці да мяне ў Нікапаль, бо я пастанавіў перазімаваць там.

¹³ Зэна законьніка і Апалёса старанна правядзі, каб у іх не было ні ў чым недахопу.

¹⁴ Няхай і нашыя вучацца выконваць добрыя справы ў пільных патрэбах, каб не былі бясплодныя.

¹⁵ Вітаюць цябе ўсе, што са мною. Прывітай тых, што сябруюць з намі ў веры. Ласка з усімі вамі. Амэн.