ЦІТА 2 - Біблія (пераклад А.Бокуна)

Ціт 2

¹ А ты гавары, як належыць здароваму вучэньню:

² каб старыя былі пільныя, сумленныя, цьвярозыя, здаровыя ў веры, любові, цярплівасьці;

³ каб старыя жанчыны паводзілі сябе, як належыцца сьвятым, не паклёпнічалі, не пілі шмат віна, вучылі добраму,

⁴ каб вучылі мудрасьці маладых, каб тыя любілі мужоў, любілі дзяцей,

⁵ былі цьвярозыя, чыстыя, гаспадарлівыя, добрыя, падпарадкаваныя сваім мужам, каб не было блюзьненьня на слова Божае.

⁶ Маладых людзей таксама ўпрошвай думаць цьвяроза,

⁷ у-ва ўсім даючы сябе за прыклад добрых учынкаў, у навучаньні — чысьціню, сумленнасьць, непахібнасьць,

⁸ слова здаровае, ненаганнае, каб той, хто супрацівіцца, быў асаромлены, ня маючы нічога благога сказаць пра нас.

⁹ Слугаў [навучай] падпарадкоўвацца сваім уладарам, у-ва ўсім падабацца ім, не пярэчачы,

¹⁰ не прыхоўваючы сабе, але зьяўляючы ўсю добрую вернасьць, каб у-ва ўсім аздаблялі вучэньне Збаўцы нашага Бога.

¹¹ Бо зьявілася ласка Божая, што дае збаўленьне для ўсіх людзей,

¹² якая навучае нас, каб, адрокшыся ад бязбожнасьці і пажадлівасьцяў сьвету, цьвяроза, праведна і пабожна жылі мы ў цяперашнім веку,

¹³ чакаючы шчасьлівае надзеі і зьяўленьня славы вялікага Бога і Збаўцы нашага Ісуса Хрыста,

¹⁴ Які даў Сябе за нас, каб выбавіць нас ад усякага беззаконьня і ачысьціць Сабе народ асаблівы, які рупіцца пра добрыя справы.

¹⁵ Гэтае кажы, упрошвай і дакарай з усякім загадам; няхай ніхто табою не пагарджае.