РЫМЛЯНАЎ 12 - Біблія (пераклад А.Бокуна)

Рым 12

¹ Дык прашу вас, браты, праз міласэрнасьць Божую, аддайце целы вашыя на ахвяру жывую, сьвятую, прыемную Богу, на разумнае служэньне вашае,

² і не прыпадабняйцеся веку гэтаму, але перамяняйцеся праз абнаўленьне розуму вашага, каб вам выпрабаваць, што ёсьць воля Божая, што добрае, і прыемнае [Богу], і дасканалае.

³ Бо праз ласку, дадзеную мне, кажу кожнаму з вас: ня думайце [пра сябе] больш, чым трэба думаць, але думайце цьвяроза, як Бог кожнага надзяліў мерай веры.

⁴ Бо як у адным целе маем шмат членаў, але ня ўсе члены маюць тую самую работу,

⁵ гэтак мы, многія, зьяўляемся адным целам у Хрысьце, а паасобку адзін для аднаго — члены.

⁶ Калі ж, паводле дадзенай нам ласкі, маем розныя дары, калі прароцтва, [няхай будзе] згодна з верай;

⁷ калі служэньне — у служэньні; калі хто вучыць — у навучаньні;

⁸ калі хто суцяшае — у суцяшэньні; калі хто раздае — у шчырасьці; калі хто кіруе — з дбайнасьцю; калі хто чыніць міласэрнасьць — з ахвотаю.

⁹ Любоў [няхай будзе] некрывадушная; брыдзьцеся зла, прыляпляйцеся да дабра.

¹⁰ Братняя любоў адзін да аднаго [няхай будзе] ад усяго сэрца, у пашане адзін аднаго выпярэджвайце;

¹¹ у дбайнасьці не лянуйцеся; духам палайце; Госпаду служыце;

¹² [маючы] надзею, радуйцеся; у прыгнёце будзьце вытрывалымі; у малітве — няспыннымі;

¹³ у патрэбах сьвятых бярыце ўдзел; імкніцеся да гасьціннасьці.

¹⁴ Дабраслаўляйце тых, якія вас перасьледуюць, дабраслаўляйце, а не кляніце.

¹⁵ Радуйцеся з тымі, хто радуецца, і плачце з тымі, хто плача.

¹⁶ Думайце адзін пра аднаго аднолькава; не ўзьвялічвайце саміх сябе, але пакорнымі захапляйцеся; ня будзьце мудрымі самі праз сябе.

¹⁷ Нікому не аддаючы ліхотай за ліхоту, дбайце пра добрае перад усімі людзьмі.

¹⁸ Калі магчыма для вас, мейце супакой з усімі людзьмі.

¹⁹ Ня помсьціце за сябе, улюбёныя, але дайце месца гневу [Божаму], бо напісана: «“Мне [належыць] помста, Я аддам”, — кажа Госпад».

²⁰ Дык, калі вораг твой галодны, накармі яго; калі смагне, напаі яго; бо, робячы гэтае, зьбярэш яму на галаву вугольлі распаленыя.

²¹ Ня будзь пераможаны злом, але перамагай зло дабром.