ПСАЛТЫР 8 - Біблія (пераклад А.Бокуна)

Пс 8

¹ Кіраўніку хору: на лад Гітыт. Псальм Давіда.

² ГОСПАДЗЕ, Госпадзе наш! Якое слаўнае імя Тваё па ўсёй зямлі! Слава Твая ўзьнесеная па-над нябёсы!

³ З вуснаў немаўлятаў і тых, што пры грудзях, Ты зрабіў умацаваньне супраць ненавісьнікаў Тваіх, каб спыніць ворага і мсьціўцу.

⁴ Калі я гляджу на неба Тваё, твор пальцаў Тваіх, на месяц і на зоркі, якія Ты паставіў,

⁵ я думаю: «Што ёсьць чалавек, што Ты памятаеш пра яго, і сын чалавечы, што Ты наведваеш яго?

⁶ Не нашмат Ты паменшыў яго перад багамі, і славай і веліччу Ты ўкаранаваў яго,

⁷ і даў яму панаваць над творамі рук Тваіх, і ўсё Ты паклаў пад ногі яму:

⁸ авечак і валоў усіх, і зьвяроў палявых,

⁹ птушак у небе, і рыбаў у моры, і ўсё, што ходзіць сьцежкамі марскімі».

¹⁰ ГОСПАДЗЕ, Госпадзе наш! Якое слаўнае імя Тваё па ўсёй зямлі!