ПСАЛТЫР 57 - Біблія (пераклад А.Бокуна)

Пс 57

¹ Кіраўніку хору: на лад: “Не загубляй!” Залатая песьня Давіда, калі ён уцякаў ад аблічча Саўла ў пячору.

² Зьлітуйся нада мною, Божа, зьлітуйся нада мною! Бо ў Табе мае надзею душа мая, і ў ценю крылаў Тваіх буду хавацца, пакуль не міне загуба.

³ Буду клікаць да Бога Найвышэйшага, да Бога, Які выканае [справу маю] для мяне.

⁴ Ён спашле з неба і збавіць мяне ад зьнявагаў таго, хто хоча мяне праглынуць. (Сэлях) Спашле Бог міласэрнасьць Сваю і праўду Сваю.

⁵ Душа мая між ільвоў, я ляжу сярод тых, што палаюць агнём, сярод сыноў чалавечых. Зубы іхнія — дзіды і стрэлы, языкі іхнія — мячы вострыя.

⁶ Узьвялічся па-над неба, Божа, па-над усёй зямлёй [няхай будзе] слава Твая.

⁷ Яны наставілі сетку дзеля стопаў маіх, прыгнялі душу маю, яны капалі яму перад абліччам маім, але [самі] ўваліліся ў яе. (Сэлях)

⁸ Умацаванае сэрца маё, Божа, умацаванае сэрца маё, буду сьпяваць і выслаўляць [Цябе].

⁹ Збудзіся, слава мая! Збудзіцеся, псалтыр і гусьлі! Я пабуджу сьвітаньне.

¹⁰ Буду славіць Цябе сярод людзей, Госпадзе, буду выслаўляць Цябе сярод народаў,

¹¹ бо аж да неба вялікая міласэрнасьць Твая, і праўда Твая — да аблокаў.

¹² Узьвялічся па-над неба, Божа, па-над усёй зямлёй [няхай будзе] слава Твая!