ПСАЛТЫР 38 - Біблія (пераклад А.Бокуна)

Пс 38

¹ Псальм Давіда. Напамін.

² ГОСПАДЗЕ, у абурэньні Тваім не карай мяне і ў ярасьці Тваёй не вучы мяне!

³ Бо стрэлы Твае пранізалі мяне, і лягла на мяне рука Твая.

⁴ Няма цэлага месца ў целе маім дзеля гневу Твайго, няма супакою ў костках маіх дзеля грэху майго.

⁵ Бо правіны мае ўзьняліся вышэй галавы маёй, як бярэмя цяжкое яны абцяжарваюць мяне.

⁶ Сьмярдзяць, гнаяцца раны мае дзеля дурасьці маёй.

⁷ Я скрывіўся, моцна схіліўся, усе дні ў смутку хаджу,

⁸ бо сьцёгны мае напоўненыя распаленымі [ранамі], і няма цэлага месца ў целе маім.

⁹ Я зьнямогся і моцна скрышаны, я выю дзеля енку сэрца майго.

¹⁰ Госпадзе мой, перад Табою ўсё жаданьне маё, і ўздыханьне маё ад Цябе не схаванае.

¹¹ Сэрца маё трапечацца; пакінула мяне сіла мая, і сьвятло вачэй маіх — няма яго ў мяне.

¹² Тыя, што любілі мяне, і бліжнія мае стаяць насупраць ранаў маіх, і сваякі мае стаяць здалёк ад мяне.

¹³ Тыя, што шукаюць душу маю, ставяць сіло [на мяне]; а тыя, што жадаюць ліхога для мяне, гавораць пра згубу маю і ўвесь дзень задумваюць падступнасьць.

¹⁴ А я, быццам глухі, ня чую, і быццам нямы, які не расчыняе вуснаў сваіх.

¹⁵ І стаўся я, быццам чалавек, які ня чуе, і няма дакараньня ў вуснах ягоных.

¹⁶ Бо на Цябе, ГОСПАДЗЕ, я спадзяюся; Ты адкажаш, Гос­падзе, Божа мой!

¹⁷ Бо я сказаў: «Няхай яны ня радуюцца з мяне! Калі пахіснулася нага мая, няхай яны не вывышаюцца нада мною».

¹⁸ Бо я блізкі да падзеньня, і боль мой заўсёды перада мною.

¹⁹ Бо беззаконьне маё я апавядаю, сумую дзеля грэху майго.

²⁰ А ворагі мае жывыя і ўзмацняюцца, і шматлікімі сталі тыя, якія няслушна мяне ненавідзяць.

²¹ Яны плацяць мне злом за дабро; яны супрацьстаяць мне, бо я за добрым ганюся.

²² Не пакінь мяне, ГОСПАДЗЕ, Божа мой, не аддаляйся ад мяне!

²³ Пасьпяшайся на ўспамогу мне, Госпадзе мой, выратаваньне маё!