ПСАЛТЫР 37 - Біблія (пераклад А.Бокуна)

Пс 37

¹ Давіда. Ня гневайся, [гледзячы] на злачынцаў, не зайздросьці тым, што робяць беззаконьне,

² бо яны, як трава, хутка ссохнуць, і павянуць, як расьліна зялёная.

³ Спадзявайся на ГОСПАДА і рабі добрае, жыві на зямлі, і захоўвай вернасьць.

⁴ Насалоджвайся ў ГОСПАДЗЕ, і Ён табе дасьць прагненьні сэрца твайго.

⁵ Аддай ГОСПАДУ шлях твой і спадзявайся на Яго, і Ён [усё] зробіць,

⁶ і выведзе праведнасьць тваю як сьвятло, і суд твой — як белы дзень.

⁷ Ціхі будзь перад ГОСПАДАМ і чакай на Яго, ня гневайся на таго, хто мае посьпех на шляху сваім, на чалавека, які робіць зламыснае.

⁸ Ухіліся ад гневу, пакінь ярасьць, ня гневайся, каб ты ня стаўся злачынцам,

⁹ бо злачынцы будуць зьнішчаныя, а тыя, што спадзяюцца на ГОСПАДА, возьмуць у спадчыну зямлю.

¹⁰ Яшчэ крыху, і ня будзе бязбожніка; глянеш на месца ягонае, а яго няма!

¹¹ А пакорныя зямлю ў спадчыну возьмуць і будуць насалоджвацца ў мностве супакою.

¹² Бязбожнік задумвае ліхое супраць праведнага і скрыгоча на яго зубамі сваімі.

¹³ Госпад сьмяецца з яго, бо бачыць, што прыходзіць дзень ягоны.

¹⁴ Бязбожнікі выцягнулі меч і нацягнулі лук свой, каб паваліць прыгнечанага і беднага, каб замардаваць тых, у каго шлях просты.

¹⁵ Меч іхні ўвойдзе ў сэрца іхняе, і лук іхні будзе зламаны.

¹⁶ Малое ў праведніка лепшае за багацьце шматлікіх бязбожнікаў.

¹⁷ Бо рамёны бязбожнікаў будуць скрышаныя, а праведнікаў падтрымлівае ГОСПАД.

¹⁸ Ведае ГОСПАД дні беззаганных, і спадчына іхняя будзе на вякі.

¹⁹ Ня будуць яны асаромленыя ў час ліхі, а ў дні голаду будуць насычаныя.

²⁰ Бо загінуць бязбожнікі, і ворагі ГОСПАДА зьнікнуць, як тлустасьць авечак у дыме зьнікае.

²¹ Бярэ бязбожнік у доўг — і [доўгу] ня верне; а праведнік літуецца і дае.

²² Бо дабраслаўлёныя [Богам] зямлю ў спадчыну возьмуць, а тыя, што праклятыя Ім, будуць зьнішчаныя.

²³ ГОСПАД умацоўвае крокі чалавека, калі шлях ягоны даспадобы Яму.

²⁴ Калі ўпадзе, не заб’ецца, бо Госпад падтрымлівае руку ягоную.

²⁵ Я быў малады і стаўся стары, і ня бачыў, каб праведнік быў пакінуты, каб насеньне ягонае шукала хлеба.

²⁶ Кожны дзень ён літуецца і пазычае, і насеньне ягонае мае дабраслаўленьне.

²⁷ Аддаліся ад зла і рабі добрае, і будзеш жыць на вякі.

²⁸ Бо ГОСПАД любіць суд, і Ён не пакіне багабойных Сваіх, на вякі захавае іх, а насеньне бязбожнікаў будзе зьнішчана.

²⁹ Праведнікі возьмуць у спадчыну зямлю і будуць жыць у ёй вечна.

³⁰ Вусны праведніка выказваюць мудрасьць, і язык ягоны гаворыць суд.

³¹ Закон Бога ягонага ў сэрцы ягоным; ня будуць хістацца крокі ягоныя.

³² Бязбожнік сочыць за праведнікам і шукае, каб прывесьці да сьмерці яго.

³³ ГОСПАД не пакіне яго ў руцэ ягонай, не асудзіць яго, калі ён будзе суджаны.

³⁴ Спадзявайся на ГОСПАДА, і захоўвай шлях Ягоны, і Ён узвысіць цябе, каб ты ўзяў у спадчыну зямлю; і калі будуць зьнішчаныя бязбожнікі, ты ўбачыш.

³⁵ Я бачыў бязбожніка, моцнага і разгалінаванага, быццам галінастае тутэйшае дрэва,

³⁶ але прамінуў ён, няма яго, і я шукаў яго, і не знайшоў.

³⁷ Зважай на беззаганнага і глядзі на правага, бо канец [гэтага] чалавека ёсьць супакой.

³⁸ А адступнікі будуць зьнішчаны чыста; і канец бязбожных — зьнішчэньне.

³⁹ Выратаваньне праведнікаў — ад ГОСПАДА, Ён — апора іхняя ў час трывогі.

⁴⁰ ГОСПАД дапаможа ім і вызваліць іх; Ён вызваліць іх ад бязбожнікаў і збавіць іх, бо яны ў Ім маюць надзею.