ПСАЛТЫР 33 - Біблія (пераклад А.Бокуна)

Пс 33

¹ Весяліцеся ў ГОСПАДЗЕ, праведнікі; правым пасуе хвала.

² Слаўце ГОСПАДА на гусьлях, выслаўляйце Яго на псалтыры дзесяціструнным!

³ Сьпявайце Яму новы сьпеў; спраўна грайце [Яму] пад трубныя гукі.

⁴ Бо слушнае слова ГОСПАДА, і ўсе творы Ягоныя верныя.

⁵ Ён любіць праведнасьць і суд; міласэрнасьцю ГОСПАДА напоўнена зямля.

⁶ Словам ГОСПАДА зроблены нябёсы, а подыхам вуснаў Ягоных — усе войскі іхнія.

⁷ Ён сабраў як капу воды марскія, Ён склаў іх у скарбніцу бяздоньняў.

⁸ Няхай баіцца ГОСПАДА ўся зямля, няхай дрыжаць перад Ім усе жыхары сусьвету.

⁹ Бо Ён сказаў — і сталася, Ён загадаў — і паўстала.

¹⁰ ГОСПАД разьбіў намеры паганаў, запярэчыў думкам народаў.

¹¹ Намер ГОСПАДА будзе трываць на вякі, думкі сэрца Ягонага — з пакаленьня ў пакаленьне.

¹² Шчасьлівы народ, у якога ГОСПАД ёсьць Бог, народ, які Ён выбраў на спадчыну для Сябе.

¹³ З неба ГОСПАД глядзіць, Ён бачыць усіх сыноў чалавечых;

¹⁴ з месца, дзе Ён жыве, Ён паглядае на ўсіх жыхароў зямлі.

¹⁵ Ён уфармаваў сэрца кожнага з іх, Ён зважае на ўсе ўчынкі іхнія.

¹⁶ Ня будзе збаўлены валадар войскам вялікім, волат ня вызваліцца праз вялікую сілу сваю;

¹⁷ ненадзейны конь для выратаваньня, і вялікая сіла ягоная ня дасьць выбаўленьня.

¹⁸ Вось, вока ГОСПАДА над тымі, якія баяцца Яго, якія спадзяюцца на міласэрнасьць Ягоную,

¹⁹ што Ён вызваліць ад сьмерці душы іхнія, і захавае жыцьцё ў [час] голаду.

²⁰ Душа нашая чакае на ГОСПАДА; Ён — дапамога наша і шчыт наш.

²¹ Бо ў Ім радуецца сэрца нашае; бо мы на імя Яго сьвятое спадзяемся.

²² Няхай будзе міласэрнасьць Твая, ГОСПАДЗЕ, над намі, як мы на Цябе спадзяемся!