ПСАЛТЫР 25 - Біблія (пераклад А.Бокуна)

Пс 25

¹ Давіда. Да Цябе, ГОСПАДЗЕ, узьнімаю я душу маю.

² Божа мой! На Цябе спадзяюся; ня дай мне быць асаромленым, ня дай ворагам маім быць нада мной пераможцамі.

³ Бо ўсе, якія на Цябе спадзяюцца, ня будуць асаромленыя. Будуць асаромлены тыя, якія адступаюцца без прычыны.

⁴ ГОСПАДЗЕ, дай мне ведаць шляхі Твае, навучы мяне сьцежкам Тваім.

⁵ Вядзі мяне ў праўдзе Тваёй і навучы, бо Ты — Бог збаўленьня майго, на Цябе спадзяюся ў-ва ўсякі дзень.

⁶ Узгадай пра літасьць Тваю, ГОСПАДЗЕ, і пра міласэрнасьць Тваю, бо яны — ад вякоў.

⁷ Пра грахі маладосьці маёй і пра правіны мае ня ўзгадвай. Паводле міласэрнасьці Тваёй Ты ўзгадай пра мяне, дзеля доб­расьці Тваёй, ГОСПАДЗЕ!

⁸ ГОСПАД добры і справядлівы, таму Ён будзе навучаць шляху [Свайму] грэшнікаў.

⁹ Ён прывядзе ўцісканых на суд і навучыць уцісканых шляху Свайму.

¹⁰ Усе сьцежкі ГОСПАДА — міласэрнасьць і праўда для тых, якія захоўваюць запавет Ягоны і сьведчаньні Ягоныя.

¹¹ Дзеля імя Твайго, ГОСПАДЗЕ, даруй мне беззаконьне маё, бо надта яно вялікае!

¹² Хто той чалавек, які баіцца ГОСПАДА? Яго Ён навучыць шляху, які [трэба] выбраць яму.

¹³ Душа ягоная будзе жыць у добрым, і насеньне ягонае зямлю ў спадчыну возьме.

¹⁴ Таямніца ГОСПАДА з тымі, што баяцца Яго, і запавет Свой Ён дае ім ведаць.

¹⁵ Вочы мае заўсёды [глядзяць] на ГОСПАДА, бо Ён выцягне з сеткі ногі мае.

¹⁶ Павярніся да мяне і зьлітуйся нада мною, бо я — самотны і прыгнечаны.

¹⁷ Трывогі сэрца майго пашырыліся, выцягні мяне з бедаў маіх!

¹⁸ Глянь на пакуты мае і нядолю маю, і даруй мне ўсе грахі мае!

¹⁹ Глянь на ворагаў маіх, бо шмат іх, і нянавісьцю злачыннаю яны ненавідзяць мяне.

²⁰ Захавай душу маю і выратуй мяне, каб ня быў я асаромлены, бо я ў Табе маю надзею.

²¹ Беззаганнасьць і праведнасьць няхай захаваюць мяне, бо я на Цябе спадзяюся.

²² Божа, збаў Ізраіля ад усіх трывогаў ягоных!