ПСАЛТЫР 19 - Біблія (пераклад А.Бокуна)

Пс 19

¹ Кіраўніку хору. Псальм Давіда.

² Нябёсы абвяшчаюць славу Божую, і прасьцяг апавядае пра творы рук Ягоных.

³ Дзень дню пераказвае вестку, і ноч ночы выказвае веданьне.

⁴ Бяз гуку, бяз словаў, ня чутны голас іхні.

⁵ Па ўсёй зямлі разыходзіцца гучаньне іхняе, а мова іхняя — да краю сусьвету. На іх Ён паставіў намёт для сонца,

⁶ і яно як жаніх выходзіць з пакою свайго, яно радасна гукае, як волат, калі прабег сьцяжыну сваю.

⁷ Ад краю неба выходзіць яно і бяжыць да краю ягонага, і нішто не схаваецца ад гарачыні ягонай.

⁸ Закон ГОСПАДА беззаганны, ён навяртае душу. Сьведчаньне ГОСПАДА вернае, яно робіць мудрым неразумнага.

⁹ Загады ГОСПАДА слушныя, яны радуюць сэрца. Прыказаньне ГОСПАДА яснае, яно прасьвятляе вочы.

¹⁰ Страх перад ГОСПАДАМ чысты, ён будзе трываць вечна. Суды ГОСПАДА праўдзівыя, а таксама справядлівыя.

¹¹ Яны больш пажаданыя, чым золата, больш, чым золата найчысьцейшае, і саладзейшыя за мёд і мёд сотавы.

¹² І слуга Твой праз іх будзе навучаны. Хто захоўвае іх, [будзе мець] нагароду вялікую.

¹³ Хто зразумее памылкі свае? Ад схаваных [грахоў] вызвалі мяне!

¹⁴ І трымай далёка слугу Твайго ад свавольства, няхай яно нада мною не пануе. Тады я буду беззаганны і ня буду мець пакараньня за правіну вялікую.

¹⁵ Няхай словы вуснаў маіх і разважаньні сэрца майго будуць даспадобы Табе, ГОСПАДЗЕ, Скала мая і Абаронца мой!