ПСАЛТЫР 145 - Біблія (пераклад А.Бокуна)

Пс 145

¹ Хвала Давіда. Буду вывышаць Цябе, Божа мой і Валадару, і дабраслаўляць імя Тваё на вякі і вечна!

² Штодня буду дабраслаўляць Цябе і буду хваліць імя Тваё на вякі і вечна.

³ Вялікі ГОСПАД і годны хвалы, і веліч Ягоная недасьледная.

⁴ Пакаленьне пакаленьню будзе хваліць творы Твае і пра магутнасьць Тваю будзе апавядаць.

⁵ Пра слаўную годнасьць велічнасьці Тваёй і пра цудоўныя дзеі Твае буду разважаць.

⁶ Пра магутнасьць [дзеяньняў] страшных Тваіх няхай гавораць яны; а я пра веліч Тваю буду абвяшчаць.

⁷ Успаміны пра вялікую добрасьць Тваю яны будуць пераказваць і весяліцца дзеля праведнасьці Тваёй.

⁸ Літасьцівы і спагадлівы ГОСПАД, павольны да гневу і вельмі міласэрны.

⁹ Добры ГОСПАД да ўсіх, і літасьць Ягоная — па-над усе справы Ягоныя.

¹⁰ Няхай славяць Цябе, ГОС­ПАДЗЕ, усе творы Твае, і багабойныя Твае няхай дабраслаўляюць Цябе!

¹¹ Пра славу Валадарства Твайго няхай гавораць яны і пра магутнасьць Тваю расказваюць,

¹² каб даведаліся сыны чалавечыя пра магутнасьць Ягоную і пра славу велічнасьці Валадарства Ягонага.

¹³ Валадарства Тваё — валадарства на ўсе вякі, і панаваньне Тваё — у-ва ўсіх пакаленьнях.

¹⁴ Падтрымлівае ГОСПАД усіх, хто падае, і падымае ўсіх прыгнечаных.

¹⁵ Вочы ўсіх на Цябе ўзіраюцца, і Ты ім спажыву даеш у свой час.

¹⁶ Ты расчыняеш руку Тваю і насычаеш усё, што жыве, паводле ўпадабаньня.

¹⁷ Праведны ГОСПАД на ўсіх шляхах Сваіх і сьвяты ў-ва ўсіх справах Сваіх.

¹⁸ ГОСПАД блізкі да ўсіх, што клічуць Яго, да ўсіх, што клічуць Яго ў праўдзе.

¹⁹ Ён робіць паводле жаданьня тых, што баяцца Яго, і чуе лямант іхні і выбаўляе іх.

²⁰ ГОСПАД захоўвае ўсіх, што любяць Яго, але ўсіх бязбожных Ён зьнішчыць.

²¹ Хвалу ГОСПАДУ будуць казаць вусны мае, і ўсякае цела няхай дабраслаўляе сьвятое імя Ягонае на вякі і вечна.