ПСАЛТЫР 107 - Біблія (пераклад А.Бокуна)

Пс 107

¹ Слаўце ГОСПАДА, бо Ён добры, бо на вякі міласэрнасьць Ягоная!

² Няхай гэтак скажуць выкупленыя ГОСПАДАМ, якіх Ён выкупіў з рукі прыгнятальніка

³ і сабраў з земляў з усходу і з захаду, з поўначы і ад мора.

⁴ Яны блукалі па пустыні, па бязьлюдзьдзі, шляху да гораду, дзе будуць жыць, не знайшлі.

⁵ Былі галоднымі і сасьмяглымі, душа іхняя ў іх зьнемаглася.

⁶ І крычалі яны да ГОСПАДА ў тузе сваёй, і Ён выратаваў іх з бяды іхняй.

⁷ І павёў Ён іх шляхам простым, каб прыйшлі да гораду, дзе будуць жыць.

⁸ Няхай славяць ГОСПАДА за міласэрнасьць Ягоную і за цуды Ягоныя для сыноў чалавечых,

⁹ бо Ён насыціў душу спрагнёную і душу галодную напоўніў дабром.

¹⁰ Яны сядзелі ў цемры і ў ценю сьмерці, увязьненыя пакутамі і жалезам,

¹¹ бо яны бунтаваліся супраць словаў Бога і радай Найвышэйшага пагрэбавалі.

¹² І Ён упакорыў сэрца іхняе нядоляй; яны спатыкнуліся, і не было дапамогі.

¹³ І крычалі яны да ГОСПАДА ў тузе сваёй, і Ён выратаваў іх з бяды іхняй.

¹⁴ Ён вывеў іх з цемры і ценю сьмерці, і кайданы іхнія парваў.

¹⁵ Няхай славяць ГОСПАДА за міласэрнасьць Ягоную і за цуды Ягоныя для сыноў чалавечых,

¹⁶ бо Ён скрышыў брамы мядзяныя і расьсек засаўкі жалезныя.

¹⁷ Яны [былі] неразумнымі на шляху правінаў сваіх і за беззаконьні свае пакутавалі.

¹⁸ Усякая ежа абрыдла душы іхняй, і блізка былі яны ад брамаў сьмерці.

¹⁹ І крычалі яны да ГОСПАДА ў тузе сваёй, і Ён выратаваў іх з бяды іхняй.

²⁰ Ён паслаў слова Сваё, і аздаравіў іх, і выбавіў іх ад магілы.

²¹ Няхай славяць ГОСПАДА за міласэрнасьць Ягоную і за цуды Ягоныя для сыноў чалавечых!

²² Няхай ахвяруюць ахвяры падзякі, і няхай абвяшчаюць з радасьцю пра дзеяньні Ягоныя!

²³ Тыя, што зыходзілі на мора на караблях і вялі справы на водах вялікіх,

²⁴ яны бачылі справы ГОСПАДА і цуды Ягоныя ў глыбінях.

²⁵ Ён сказаў, і стаўся вецер бурны, і ўзьняліся хвалі,

²⁶ і яны ўздымаюцца пад неба, і падаюць у бяздоньне; душа іхняя ў [гэтым] ліху млее,

²⁷ бадзяюцца і хістаюцца, як п’яныя, і ўся мудрасьць іхняя марная.

²⁸ І крычалі яны да ГОСПАДА ў тузе сваёй, і Ён выратаваў іх з бяды іхняй.

²⁹ Ён перамяніў буру ў цішу, і суцішыліся хвалі.

³⁰ І ўзрадаваліся яны, што [ўсё] сьціхла, і Ён іх прывёў да жаданай прыстані.

³¹ Няхай славяць ГОСПАДА за міласэрнасьць Ягоную і за цуды Ягоныя для сыноў чалавечых!

³² Няхай вывышаюць Яго ў зборы народу і паміж старшыняў няхай хваляць Яго!

³³ Ён перамяніў рэкі ў пустыню і крыніцы водаў — у сухую зямлю,

³⁴ і ўрадлівую зямлю — у салёную, за ліхоту тых, што жывуць на ёй.

³⁵ Ён перамяніў пустыню ў возера водаў і сухую зямлю — у крыніцы водаў,

³⁶ і там пасяліў галодных, і яны паставілі горад, дзе будуць жыць,

³⁷ і засеялі палі, і пасадзілі вінаграднік, і атрымалі плод багаты.

³⁸ І Ён дабраслаўляў іх, і яны множыліся вельмі; і не зьмяншалася ў іх скаціны.

³⁹ Але [пасьля] іх паменшала, і яны схіліліся пад цяжарам ліхоты і смутку.

⁴⁰ Ён вылівае пагарду на князёў і кідае іх блукаць па пустках без дарогі.

⁴¹ Ён падымае прыгнечанага з нэндзы, і робіць плямёны як [чароды] авечак.

⁴² Убачаць гэта правыя і ўзьвесяляцца; і ўсякая несправядлівасьць закрые вусны свае.

⁴³ Хто мудры, той гэта захавае, і зразумее міласэрнасьць ГОСПАДА!