ПЕСЬНЯ 7 - Біблія (пераклад А.Бокуна)

Псн 7

¹ «Агляніся, агляніся, Шуламянка, агляніся, агляніся, і мы паглядзім на цябе». «Што вы глядзіце на Шуламянку, нібы на танец двух карагодаў?»

² «Якія прыгожыя ногі твае ў сандалах, дачка шляхетная! Выгін клубоў тваіх як аздобны абруч, які зроблены рукою майстра.

³ Улоньне тваё — як чаша круглая, ніколі не забракне ў ёй віна мяшанага; жывот твой — як сноп пшаніцы, абстаўлены лілеямі.

⁴ Двое грудзей тваіх — як двое казьлянятаў, блізьнятаў сарны.

⁵ Шыя твая — як вежа з косьці слановае. Вочы твае — як сажалкі ў Хешбоне, каля брамы Бат-Раббім. Нос твой — як вежа Лібану, што глядзіць у бок Дамаску.

⁶ Галава твая над табою — як Кармэль, а валасы на галаве тваёй — як пурпур. Валадар зьвязаны косамі [тваімі].

⁷ Якая ты прыгожая і якая прыемная, каханая, у асало­дзе [тваёй]!

⁸ Стан твой [гонкі], як пальма, а грудзі — як гронкі [вінаградныя].

⁹ Я сказаў: “Узьлезу я на пальму і схаплю гронкі яе”, і будуць грудзі твае як гронкі вінаградныя, і пах подыху твайго — як [пах] яблыкаў.

¹⁰ Вусны твае — як віно найлепшае, якое ліецца да любага, асалоджваючы вусны стомленыя».

¹¹ «Я [належу] любаму майму, і да мяне памкненьне ягонае.

¹² Прыйдзі, любы мой, пойдзем у поле, пераначуем за горадам.

¹³ Устанем раніцай, наведаем вінаграднікі, паглядзім, ці заквітнеў вінаград, ці распусьціліся кветкі ці цьвітуць дрэвы гранатовыя, там я дам табе каханьне маё.

¹⁴ Мандрагоры разьліваюць водар, у дзьвярах нашых усякія плады адборныя, новыя і старыя, якія я, любы мой, захавала для цябе».