ПІЛІПЯНАЎ 4 - Біблія (пераклад А.Бокуна)

Флп 4

¹ Так што, браты мае ўлюбёныя і пажаданыя, радасьць і вянок мой, стойце так у Госпадзе, улюбёныя.

² Эўводзію прашу і Сынтыхею прашу думаць гэтаксама ў Госпадзе.

³ Прашу і цябе, шчыры памочніку, дапамагай тым, якія змагаліся дзеля Эвангельля разам са мною, і з Клемэнтам, і з іншымі супрацоўнікамі маімі, імёны якіх у кнізе жыцьця.

⁴ Радуйцеся заўсёды ў Госпадзе. Ізноў кажу: радуйцеся.

⁵ Спагаднасьць вашая няхай будзе вядомая ўсім людзям. Госпад блізка!

⁶ Не турбуйцеся ні пра што, але ў-ва ўсякай малітве і просьбе з падзякай няхай адкрываюцца жаданьні вашыя перад Богам,

⁷ і супакой Божы, які вышэй за ўсякі розум, няхай захавае сэрцы вашыя і думкі вашыя ў Хрысьце Ісусе.

⁸ Нарэшце, браты, што ёсьць праўдзівае, што сумленнае, што справядлівае, што чыстае, што вартае любові, што добрай славы, калі ёсьць якая цнота і якая пахвала, — пра тое думайце.

⁹ І чаго вы навучыліся, і што прынялі, і чулі, і бачылі ў-ва мне, тое рабіце, і Бог супакою будзе з вамі.

¹⁰ Я вельмі ўзрадаваўся ў Госпадзе, што вы ўжо зноў ажывіліся, каб думаць пра мяне, як і раней думалі, ды ня мелі нагоды.

¹¹ Ня дзеля таго, што я ў нястачы, кажу, бо я навучыўся быць задаволеным тым, што ў мяне ёсьць.

¹² Ведаю, як у паніжэньні быць, і ведаю, як у дастатку; навучыўся ўсяго і ў-ва ўсім: і насычацца, і галадаваць, мець і дастатак, і нястачу.

¹³ Усё магу ў Хрысьце, Які ўмацоўвае мяне.

¹⁴ Па-за гэтым, вы добра зрабілі, што ўдзельнічалі ў маім прыгнёце.

¹⁵ Вы ж ведаеце, Філіпяне, што на пачатку [абвяшчэньня] Эвангельля, калі я выйшаў з Македоніі, ніводная царква не далучылася да мяне праз дораньне і прыняцьцё, акрамя вас адных.

¹⁶ Вы і ў Тэсалоніку і раз, і два пасылалі паводле патрэбы маёй.

¹⁷ Ня тое, каб я шукаў дару, але шукаю плоду, які памнажаецца на вашу карысьць.

¹⁸ Я маю ўсё і маю дастатак; я напоўнены, атрымаўшы ад Эпафрадыта тое, што ад вас, водар салодкі, ахвяру прыемную, якая падабаецца Богу.

¹⁹ А Бог мой няхай напоўніць усякую патрэбу вашую паводле багацьця Свайго ў славе, у Хрысьце Ісусе.

²⁰ Богу ж і Айцу нашаму слава на вякі вякоў. Амэн.

²¹ Прывітайце кожнага сьвятога ў Хрысьце Ісусе. Вітаюць вас браты, што са мною.

²² Вітаюць вас усе сьвятыя, а найбольш тыя, што з дому цэзара.

²³ Ласка Госпада нашага Ісуса Хрыста з усімі вамі. Амэн.