МАЦЬВЕЯ 4 - Біблія (пераклад А.Бокуна)

Мц 4

¹ Тады Ісус заведзены быў Духам у пустыню дзеля спакушэньня праз д’ябла,

² і, прапасьціўшы сорак дзён і сорак начэй, нарэшце згаладнеў.

³ І, падыйшоўшы да Яго, спакусьнік сказаў: «Калі Ты — Сын Божы, скажы, каб камяні гэтыя сталіся хлябамі».

⁴ Ён жа, адказваючы, сказаў яму: «Напісана: “Ня хлебам адным будзе жыць чалавек, але ўсякім словам, што выходзіць з вуснаў Божых”».

⁵ Потым бярэ Яго д’ябал у сьвяты горад, і стаўляе на самым версе сьвятыні,

⁶ і кажа Яму: «Калі Ты — Сын Божы, кінься ўніз, бо напісана: “Анёлам Сваім загадае пра Цябе, і на руках панясуць Цябе, каб не спатыкнуўся аб камень нагою Тваёю”».

⁷ Ісус сказаў яму: «Ізноў жа напісана: “Не спакушай Госпада, Бога твайго”».

⁸ Ізноў бярэ Яго д’ябал на вельмі высокую гару, і паказвае Яму ўсе валадарствы сьвету і славу іх,

⁹ і кажа Яму: «Усё гэта дам Табе, калі, упаўшы, паклонішся мне».

¹⁰ Тады Ісус кажа яму: «Адыйдзі ад Мяне, шатан! Бо напісана: “Госпаду, Богу твайму, пакланяйся і Яму аднаму служы”».

¹¹ Тады пакідае Яго д’ябал; і вось, анёлы прыступіліся і служылі Яму.

¹² А пачуўшы, што Ян у вязьніцы, Ісус адыйшоў у Галілею.

¹³ І, пакінуўшы Назарэт, прыйшоў і асеў у Капэрнауме прыморскім, у межах Завулёна і Нэфталі,

¹⁴ каб споўнілася сказанае праз прарока Ісаю, які кажа:

¹⁵ «Зямля Завулёна і зямля Нэфталі, на дарозе прыморскай за Ярданам, Галілея паганская,

¹⁶ народ, які сядзеў у цемры, убачыў сьвятло вялікае, і тым, што сядзелі ў краіне і ценю сьмерці, сьвятло зазьзяла».

¹⁷ З таго часу Ісус пачаў абвяшчаць і казаць: «Навярніцеся, бо наблізілася Валадарства Нябеснае».

¹⁸ Праходзячы ж недалёка ад мора Галілейскага, Ён убачыў двух братоў, Сымона, называнага Пятром, і Андрэя, брата ягонага, якія закідалі сеткі ў мора, бо яны былі рыбаловы,

¹⁹ і кажа ім: «Ідзіце за Мною, і Я зраблю вас лаўцамі чалавекаў».

²⁰ І яны адразу, пакінуўшы сеці, пайшлі за Ім.

²¹ Ідучы адтуль далей, убачыў Ён іншых двух братоў, Якуба Заўдыявага і Яна, брата ягонага, у чаўне з Заўдыем, бацькам іхнім, якія правілі сеці свае, і паклікаў іх.

²² І яны адразу, пакінуўшы човен і бацьку свайго, пайшлі за Ім.

²³ І хадзіў Ісус па ўсёй Галілеі, навучаючы ў сынагогах іхніх і абвяшчаючы Эвангельле Валадарства, і аздараўляючы ўсякую хваробу і ўсякую немач у народзе.

²⁴ І прайшлі пра Яго чуткі па ўсёй Сірыі, і прыводзілі да Яго ўсіх нядужых, з рознымі хворасьцямі і пакутамі, і апанаваных дэманамі, і люнатыкаў, і спараліжаваных, і Ён іх аздараўляў.

²⁵ І ішлі за Ім шматлікія натоўпы з Галілеі, і Дэкапалю, і Ерусаліму, і Юдэі, і з таго боку Ярдану.