МАЦЬВЕЯ 14 - Біблія (пераклад А.Бокуна)

Мц 14

¹ У той час пачуў Ірад тэтрарх чутку пра Ісуса

² і сказаў слугам сваім: «Гэта Ян Хрысьціцель; ён уваскрошаны з мёртвых, і дзеля гэтага цуды дзеюцца праз яго».

³ Бо Ірад, схапіўшы Яна, увязьніў яго і пасадзіў у вязьніцу за Ірадыяду, жонку Філіпа, брата свайго,

⁴ бо Ян казаў яму: «Не належыцца табе мець яе».

⁵ І, хочучы забіць яго, баяўся натоўпу, бо яго мелі за прарока.

⁶ А калі Ірад спраўляў народзіны, дачка Ірадыяды таньчыла пасярод іх і спадабалася Іраду.

⁷ Таму ён з прысягаю паабяцаў ёй даць, чаго б ні папрасіла.

⁸ Яна ж, падвучаная маці сваёй, сказала: «Дай мне тут на місе галаву Яна Хрысьціцеля».

⁹ І засумаваў валадар, але дзеля прысягі і тых, што ўзьлягалі з ім, загадаў даць.

¹⁰ І паслаў адсячы галаву Яну ў вязьніцы.

¹¹ І прынесьлі галаву яго на місе, і далі дзяўчыне, і яна занесла маці сваёй.

¹² І вучні ягоныя, прыйшоўшы, узялі цела і пахавалі яго; і, пайшоўшы, паведамілі Ісусу.

¹³ І, пачуўшы, Ісус адыйшоў адтуль на чаўне ў пустыннае месца адзін, і натоўп, пачуўшы тое, пайшоў за Ім з гарадоў пехатою.

¹⁴ І, выйшаўшы, Ісус убачыў шматлікія натоўпы, і зьлітаваўся над імі, і аздаравіў нямоглых іхніх.

¹⁵ А калі настаў вечар, падыйшлі да Яго вучні Ягоныя, кажучы: «Тут месца пустыннае, і гадзіна ўжо позьняя; адпусьці натоўпы, каб, пайшоўшы ў мястэчкі, купілі сабе ежы».

¹⁶ А Ісус сказаў ім: «Ня трэба ім ісьці. Вы дайце ім есьці».

¹⁷ Яны ж кажуць Яму: «Нічога тут ня маем, толькі пяць хлябоў і дзьве рыбы».

¹⁸ А Ён сказаў: «Прынясіце Мне іх сюды».

¹⁹ І, загадаўшы натоўпам узьлегчы на траве, узяў пяць хлябоў і дзьве рыбы, і, зірнуўшы ў неба, дабраславіў і, паламаўшы, даў вучням хлеб, а вучні — натоўпу.

²⁰ І елі ўсе, і насыціліся; і сабралі кавалкаў, што засталіся, дванаццаць поўных кашоў.

²¹ А тых, што елі, было каля пяці тысячаў мужчынаў, акрамя жанчынаў і дзяцей.

²² І адразу змусіў Ісус вучняў Сваіх увайсьці ў човен і плысьці перш за Яго на другі бок, пакуль Ён адпусьціць натоўпы.

²³ І, адпусьціўшы натоўпы, Ён узыйшоў на гару памаліцца насамоце; і, як надыйшоў вечар, быў там адзін.

²⁴ А човен ужо быў пасярод мора, кіданы хвалямі, бо вецер быў супраціўны.

²⁵ А ў чацьвёртую варту ночы пайшоў да іх Ісус, ідучы па моры.

²⁶ І вучні, убачыўшы Яго, як ішоў па моры, стрывожыліся, кажучы: «Гэта здань», і ад страху закрычалі.

²⁷ Ісус жа адразу загаварыў з імі, кажучы: «Будзьце пэўныя, гэта Я; ня бойцеся».

²⁸ Адказваючы ж Яму, Пётар сказаў: «Госпадзе! Калі гэта Ты, загадай мне ісьці да Цябе па вадзе».

²⁹ Ён жа сказаў: «Ідзі». І, выйшаўшы з чаўна, Пётар пайшоў па вадзе, ідучы да Ісуса.

³⁰ Але, бачачы моцны вецер, спалохаўся і, пачаўшы тануць, закрычаў, кажучы: «Госпадзе, ратуй мяне!»

³¹ А Ісус адразу, працягнуўшы руку, схапіў яго і кажа яму: «Малаверны! Чаму ты засумняваўся?»

³² І калі ўвайшлі яны ў човен, вецер сьціх.

³³ А тыя, што былі ў чаўне, падыйшоўшы, пакланіліся Яму, кажучы: «Сапраўды, Ты — Сын Божы!»

³⁴ І, пераплыўшы, прыйшлі ў зямлю Генэсарэцкую.

³⁵ І людзі тамтэйшыя, пазнаўшы Яго, паслалі ў-ва ўсю ваколіцу тую, і прынесьлі да Яго ўсіх хворых.

³⁶ І прасілі Яго, каб толькі дакрануцца да краю адзеньня Ягонага; і ўсе, якія дакрануліся, былі аздароўленыя.