ЛУКАША 23 - Біблія (пераклад А.Бокуна)

Лк 23

¹ І, падняўшыся, усё мноства іх павяло Яго да Пілата.

² І пачалі абвінавачваць Яго, кажучы: «Гэтага знайшлі мы, што Ён псуе народ і забараняе плаціць падаткі цэзару, называючы Сябе Хрыстом Валадаром».

³ А Пілат спытаўся ў Яго, кажучы: «Ты — Валадар Юдэйскі?» Ён жа, адказваючы яму, прамовіў: «Ты кажаш».

⁴ А Пілат сказаў першасьвятарам і натоўпам: «Я не знаходжу аніякае віны ў гэтым Чалавеку».

⁵ А яны настойвалі, кажучы, што Ён падбухторвае народ, навучаючы па ўсёй Юдэі, пачынаючы ад Галілеі аж дасюль.

⁶ Пілат, пачуўшы пра Галілею, спытаўся: «Ці ж гэты Чалавек — Галілеец?»

⁷ І, даведаўшыся, што Ён з-пад улады Ірада, паслаў Яго да Ірада, які ў тыя дні быў у Ерусаліме.

⁸ А Ірад, убачыўшы Ісуса, вельмі ўзрадаваўся, бо даўно хацеў убачыць Яго, бо шмат чуў пра Яго і спадзяваўся ўбачыць нейкі знак, які Ён учыніць.

⁹ І пытаўся ў Яго шматлікімі словамі, а Ён нічога не адказваў яму.

¹⁰ А першасьвятары і кніжнікі стаялі, заўзята абвінавачваючы Яго.

¹¹ Ірад жа з жаўнерамі сваімі, пагардзіўшы Ім і пазьдзекваўшыся з Яго, апрануў Яго ў сьветлае адзеньне і паслаў Яго да Пілата.

¹² І сталіся ў той дзень Пілат і Ірад сябрамі, бо раней мелі варожасьць між сабою.

¹³ Пілат жа, склікаўшы першасьвятароў, і начальнікаў, і народ,

¹⁴ сказаў ім: «Вы прывялі да мяне Чалавека гэтага, як таго, хто адварочвае [ад уладаў] народ. І вось я, пры вас дапытаўшы, не знайшоў у Чалавеку гэтым аніякай віны, у якой вы Яго абвінавачваеце.

¹⁵ І таксама Ірад [нічога не занйшоў], бо я пасылаў вас да яго. І вось, нічога ня знойдзена ў Ім, вартага сьмерці.

¹⁶ Таму, пакараўшы Яго, я вызвалю [Яго]».

¹⁷ А яму трэба было на сьвята вызваліць ім аднаго [вязьня].

¹⁸ А ўсё мноства закрычала, кажучы: «Вазьмі Яго! А нам вызвалі Бараббу!»

¹⁹ А той быў кінуты ў вязьніцу за паўстаньне, якое ён учыніў у горадзе, і забойства.

²⁰ Тады Пілат ізноў прамовіў, хочучы вызваліць Ісуса.

²¹ А яны крычалі, кажучы: «Укрыжуй, укрыжуй Яго!»

²² Ён жа трэці раз сказаў ім: «Якое зло Ён учыніў? Аніякай сьмяротнай віны я не знайшоў у Ім; дык пакараўшы Яго, вызвалю».

²³ Яны ж дамагаліся моцным голасам, просячы, каб Яго ўкрыжавалі. І перамаглі галасы іхнія і першасьвятароў.

²⁴ І Пілат прысудзіў, каб сталася паводле просьбы іхняй:

²⁵ вызваліў ім таго, хто за паўстаньне і забойства быў кінуты ў вязьніцу, якога яны прасілі, а Ісуса выдаў на іх волю.

²⁶ І калі вялі Яго, узяўшы нейкага Сымона Кірэнэйца, які ішоў з поля, усклалі на яго крыж, каб нёс за Ісусам.

²⁷ А за Ім ішло вялікае мноства народу і жанчынаў, якія плакалі і галасілі па Ім.

²⁸ Ісус жа, павярнуўшыся да іх, сказаў: «Дочкі Ерусалімскія! Ня плачце па Мне, але плачце па сабе і па дзецях вашых,

²⁹ бо вось прыходзяць дні, калі скажуць: “Шчасьлівыя няплодныя, і чэравы, якія не нараджалі, і грудзі, якія не кармілі”.

³⁰ Тады пачнуць гаварыць гарам: “Упадзіце на нас!”, і ўзгоркам: “Прыкрыйце нас!”

³¹ Бо калі з зялёным дрэвам гэтае робяць, дык з сухім што станецца?»

³² Вялі ж з Ім на сьмерць і двух іншых злачынцаў.

³³ І калі прыйшлі на месца, называнае Чараповае, там укрыжавалі Яго і злачынцаў, аднаго з правага, а другога — з левага боку.

³⁴ Ісус жа сказаў: «Ойча, даруй ім, бо ня ведаюць, што робяць». А тыя, што дзялілі шаты Ягоныя, кінулі жэрабя.

³⁵ І стаяў народ, гледзячы. А разам з імі насьміхаліся і начальнікі, кажучы: «Другіх збаўляў, няхай жа Сябе Самога збавіць, калі Ён — Хрыстос, Выбранец Божы».

³⁶ Зьдзекваліся з Яго і жаўнеры, падыходзячы, і прыносячы Яму воцат,

³⁷ і кажучы: «Калі Ты — Валадар Юдэйскі, збаў Сябе Самога».

³⁸ І быў над Ім надпіс, напісаны пісаньнямі грэцкімі, рымскімі і гебрайскімі: «Гэта — Валадар Юдэйскі».

³⁹ Адзін з павешаных злачынцаў блюзьніў на Яго, кажучы: «Калі Ты — Хрыстос, збаў Сябе і нас».

⁴⁰ Адказваючы, другі забараняў яму, кажучы: «Ці ж ты не баішся Бога, бо і сам маеш такі самы прысуд?

⁴¹ І мы сапраўды [асуджаны] справядліва, бо атрымалі вартае таго, што мы зрабілі, а Ён нічога благога не зрабіў».

⁴² І сказаў Ісусу: «Узгадай пра мяне, Госпадзе, калі прыйдзеш у Валадарства Тваё!»

⁴³ І сказаў яму Ісус: «Сапраўды кажу табе: сёньня будзеш са Мною ў раі».

⁴⁴ А было каля шостае гадзіны, і сталася цемра па ўсёй зямлі да гадзіны дзявятае,

⁴⁵ і зацьмілася сонца, і заслона ў бажніцы была разьдзёртая пасярэдзіне.

⁴⁶ І ўсклікнуўшы моцным голасам, Ісус сказаў: «Ойча, у рукі Твае аддаю Дух Мой». І, сказаўшы гэтае, аддаў духа.

⁴⁷ Сотнік жа, убачыўшы ўсё, што сталася, праславіў Бога, кажучы: «Праўдзіва, Чалавек гэты быў праведнік».

⁴⁸ І ўвесь натоўп, які зграмадзіўся на гэта відовішча, бачачы, што здарылася, варочаўся, б’ючы сябе ў грудзі.

⁴⁹ А ўсе знаёмыя з Ім і жанчыны, якія ішлі за Ім з Галілеі, стаялі здалёк, гледзячы на гэта.

⁵⁰ І вось чалавек на імя Язэп, які быў ратманам, чалавек добры і праведны,

⁵¹ які не згаджаўся з радай і ўчынкам іхнім, з Арыматэі, гораду Юдэйскага, які таксама чакаў Валадарства Божага,

⁵² прыйшоўшы да Пілата, прасіў цела Ісуса,

⁵³ і, зьняўшы Яго [з крыжа], абкруціў палатнінаю і палажыў Яго ў магіле, якая была высечаная ў скале, дзе яшчэ ніхто ня быў пахованы.

⁵⁴ Дзень быў днём прыгатаваньня, і надыходзіла субота.

⁵⁵ І жанчыны, што былі прыйшоўшы з Ім з Галілеі, пайшлі глядзець магілу і як было пакладзена цела Ягонае.

⁵⁶ А вярнуўшыся, падрыхтавалі духмянасьці і міра. І ў суботу супачывалі паводле прыказаньня.