ГАЛЯТАЎ 5 - Біблія (пераклад А.Бокуна)

Гал 5

¹ Дык стойце ў свабодзе, якою вызваліў нас Хрыстос, і не патрапляйце ізноў пад ярмо няволі.

² Вось я, Павал, кажу вам, што, калі вы абрэзваецеся, Хрыстос вам ня дасьць ніякай карысьці.

³ Зноў жа сьведчу ўсякаму чалавеку, які абрэзваецца, што ён павінен выканаць увесь Закон.

⁴ Вы, якія апраўдваецеся праз Закон, зьнішчылі [ў сабе] Хрыста, адпалі ад ласкі.

⁵ Бо мы духам праз веру чакаем надзеі праведнасьці.

⁶ Бо ў Хрысьце Ісусе ня мае сілы ані абразаньне, ані неабразаньне, але вера, якая дзейнічае праз любоў.

⁷ Вы беглі добра. Хто перашкодзіў вам, каб вы ня мелі перакананасьці ў праўдзе?

⁸ Гэткае перакананьне не ад Таго, Які вас кліча.

⁹ Малая кісьля ўсё цеста квасіць.

¹⁰ Я перакананы наконт вас у Госпадзе, што вы ня будзеце думаць аніяк іначай. А той, хто вас трывожыць, хто б ён ні быў, атрымае асуджэньне.

¹¹ Калі ж я, браты, усё яшчэ абвяшчаю абразаньне, чаму я перасьледаваны? Тады зьнішчанае будзе згаршэньне крыжа.

¹² О, каб былі адсечаны тыя, якія вас бунтуюць!

¹³ Бо вы да свабоды пакліканыя, браты. Толькі каб свабода ня [сталася] нагодай для [пажаданьняў] цела, але праз любоў служыце адзін аднаму.

¹⁴ Бо ўвесь Закон у адным слове спаўняецца: «Любі бліжняга твайго як самога сябе».

¹⁵ Калі ж адзін аднаго кусаеце і зьядаеце, глядзіце, ня будзьце зьнішчаныя адзін адным.

¹⁶ А я кажу: хадзіце [паводле] духа і пажаданьняў цела ня будзеце спаўняць.

¹⁷ Бо цела жадае насупраць духу, а дух — насупраць целу: яны адзін аднаму працівяцца, каб вы рабілі ня тое, што б хацелі.

¹⁸ Калі ж вы ведзеныя духам, вы не пад Законам.

¹⁹ А ўчынкі цела яўныя, яны ёсьць чужалоства, распуста, нячыстасьць, бессаромнасьць,

²⁰ ідалапаклонства, чараўніцтва, варожасьць, сваркі, рэўнасьць, ярасьць, сварлівасьць, нязгода, герэзіі,

²¹ зайздрасьць, забойствы, п’янства, гулянкі і падобнае гэтаму. Гэта наперад кажу вам, як і раней казаў, што тыя, якія гэтак робяць, не ўспадкаемяць Валадарства Божага.

²² Плод жа Духа — любоў, радасьць, супакой, доўгацярплівасьць, ласкавасьць, добрасьць, вера,

²³ ціхасьць, стрыманасьць. Супраць гэтакіх няма Закону.

²⁴ А тыя, якія Хрыстовыя, укрыжавалі цела з пакутамі і пажаданьнямі.

²⁵ Калі мы жывем [паводле] Духа, дык і ходзім сьледам за Духам.

²⁶ Не шукайма пустой славы, адзін аднаго раздражняючы, адзін аднаму зайздросьцячы.