ВЫСЛОЎІ 31 - Біблія (пераклад А.Бокуна)

Разьдзел 31

¹ Словы Лемуэля, валадара, выслоўі, якім навучыла яго маці ягоная.

² Што, сыне мой? Што, сыне жывата майго? Што, сыне абяцаньняў маіх?

³ Не давай жанчынам сілы тваёй, ані шляхоў тваіх нішчыцелькам валадароў.

⁴ Не валадарам, Лемуэлю, не валадарам піць віно, і не князям — сікеру,

⁵ каб не напіліся і не забыліся яны на напісанае, і каб не скрывілі суд для ўсіх прыгнечаных.

⁶ Дайце сікеру таму, хто гіне, а віно — засмучаным душою.

⁷ Няхай вып’е такі і забудзецца на бядоту сваю, і ня памятае больш цяжару свайго.

⁸ Адчыні вусны твае дзеля нямых, дзеля абароны ўсіх сіротаў.

⁹ Адчыні вусны твае, судзі праведна, абараняй прыгнечанага і беднага.

¹⁰ Хто знойдзе жонку дабрадзейную? Яна даражэй за пэрліны.

¹¹ Пэўнае ў ёй сэрца мужа яе, і ён не застанецца без прыбытку.

¹² Яна дае яму дабро, а ня зло, у-ва ўсе дні жыцьця свайго.

¹³ Шукае яна воўну і лён, і ахвотна працуе рукамі сваімі.

¹⁴ Яна падобная да караблёў купецкіх, здалёк прыносіць хлеб свой.

¹⁵ І ўстае яна сярод ночы, і раздае ежу ў доме сваім, і належнае служкам сваім.

¹⁶ Падумае яна пра поле, і купляе яго, з плоду рук сваіх закладае вінаграднік.

¹⁷ Яна падпярэзвае моцаю сьцёгны свае і ўмацоўвае рамёны свае.

¹⁸ Яна адчувае, што добры занятак яе, і сьветач яе ня тухне і ўначы.

¹⁹ Працягвае рукі свае да кудзелі, а далоні яе трымаюць верацяно.

²⁰ Далоні свае адкрывае прыгнечанаму, і руку сваю працягвае беднаму.

²¹ Не баіцца сьцюжы для дому свайго, бо ўвесь дом яе ў кармазын апрануты.

²² Дываны яна робіць сабе, вісон і пурпур — адзеньне яе.

²³ У брамах [гораду] вядомы муж ейны, калі сядзіць сярод старшыняў зямлі.

²⁴ Робіць яна палатніну, і продае яе, і дастаўляе паясы купцам Хананейскім.

²⁵ Сіла і велічнасьць — адзеньне яе, і радуецца яна дню, што прыходзіць.

²⁶ Яна адкрывае вусны свае з мудрасьцю, і міласэрнае настаўленьне на языку ў яе.

²⁷ Яна пільнуе шэсьце дому свайго і ня есьць хлеба гультайства.

²⁸ Устаюць дзеці ейныя, і называюць шчасьлівай яе, і муж ейны хваліць яе:

²⁹ «Шмат было жанчынаў дабрадзейных, але ты пераўзыйшла іх усіх!»

³⁰ Прывабнасьць падманлівая і прыгажосьць марная, але жанчына, якая баіцца ГОСПАДА, годная пахвалы.

³¹ Дайце ёй з пладоў рук ейных, і няхай справы яе ў брамах [гораду] хваляць яе.