ВЫСЛОЎІ 22 - Біблія (пераклад А.Бокуна)

Разьдзел 22

¹ Лепш [добрае] імя, чым вялікія багацьці, лепш добрая слава, чым срэбра і золата.

² Багаты і бедны сустракаюцца, Творца іх усіх — ГОСПАД.

³ Разумны бачыць зло і хаваецца, а неразумныя ідуць і будуць пакараныя.

⁴ [Нагарода] за пакору і страх перад ГОСПАДАМ — багацьце, і слава, і жыцьцё.

⁵ Церні і пасткі на шляху крывадушнага, а хто захоўвае душу сваю, той аддаляецца ад іх.

⁶ Пастаў юнака на слушны шлях, і ён ня збочыць з яго, нават калі састарэе.

⁷ Багаты пануе над бедным, і чалавек, які ўзяў пазыку, — слуга паверніка.

⁸ Хто сее беззаконьне, той будзе жаць ліха, і кій гневу ягонага будзе зьнішчаны.

⁹ Хто мае добрае вока, той будзе дабраслаўлёны, бо з хлеба свайго дае ўбогаму.

¹⁰ Выгані насьмешніка, і адыйдзе звадка, і суцішацца спрэчкі і абразы.

¹¹ Хто любіць чыстасьць сэрца, у таго ласка на вуснах яго, і валадар з ім сябруе.

¹² Вочы ГОСПАДА захоўваюць веданьне, Ён касуе словы ліхадзея.

¹³ Гультай кажа: «Леў на двары, пасярод плошчы я буду забіты».

¹⁴ Вусны чужаніцы — глыбокая яма; на каго загневаўся ГОСПАД, той уваліцца туды.

¹⁵ Дурасьць прывязаная да сэрца юнака, але дубец настаўленьня выганіць яе.

¹⁶ Хто ўціскае ўбогага, каб памножыць сваё, і дае багатаму, той згалее.

¹⁷ Прыхілі вуха тваё, і слухай словы мудрых, і сэрца тваё зьвярні да ведаў маіх,

¹⁸ бо цудоўна будзе, калі захаваеш іх у нутры тваім, і будуць яны таксама на вуснах тваіх,

¹⁹ каб пэўнасьць твая была ў ГОСПАДЗЕ, я вучу цябе сёньня.

²⁰ Ці ж не пісаў я табе тройчы парады і навучаньні,

²¹ каб паведаміць табе дакладныя словы праўды, каб ты мог перадаць словы праўды тым, што паслалі цябе?

²² Не абдзірай убогага, таму што ён убогі, і не ўціскай прыгнечанага каля брамы,

²³ бо ГОСПАД будзе бараніць у справе іхняй і адбярэ душу ў тых, якія іх абіраюць.

²⁴ Не сябруй з васпанам гняўлівым і з чалавекам нястрыманым не хадзі,

²⁵ каб ты не навучыўся сьцежкам яго і не нацягнуў пятлі на душу тваю.

²⁶ Ня будзь з тых, што даюць руку, што заручаюцца за даўгі.

²⁷ Калі ня маеш, чым заплаціць, навошта маюць забраць з-пад цябе ложак твой?

²⁸ Не перасоўвай мяжы старадаўняй, якую вызначылі бацькі твае.

²⁹ Ці бачыў ты чалавека, спраўнага ў занятку сваім? Перад абліччам валадароў ён будзе стаяць, ня будзе ён стаяць перад прасьцякамі.