ВЫСЛОЎІ 15 - Біблія (пераклад А.Бокуна)

Разьдзел 15

¹ Лагодны адказ адхіляе ярасьць, а слова абразьлівае выклікае гнеў.

² Язык мудрых прыносіць веды, а вусны неразумных выказваюць глупства.

³ Вочы ГОСПАДА на кожным месцы, яны бачаць добрых і ліхіх.

⁴ Здаровы язык — дрэва жыцьця, а зласьлівы — заламаньне духа.

⁵ Неразумны грэбуе настаўленьнем бацькі, а хто зважае на дакараньні — разумнее.

⁶ У доме праведніка шмат багацьця, а ў набытках бязбожніка — замяшаньне.

⁷ Вусны мудрых сеюць веды, а сэрца бязглуздых не такое.

⁸ Ахвяра бязбожнікаў — агіда для ГОСПАДА, а малітвы правых Яму даспадобы.

⁹ Агіда для ГОСПАДА — шлях бязбожніка, а таго, хто імкнецца да праведнасьці, Ён любіць.

¹⁰ Таму, хто ўхіляецца з дарогі, — строгая кара, і той, хто дакараньне ненавідзіць, — памрэ.

¹¹ Адхлань і пекла перад [вачыма] ГОСПАДА, а тым больш сэрцы сыноў чалавечых.

¹² Насьмешнік ня любіць таго, хто яго дакарае, і да мудрых ня пойдзе.

¹³ Радаснае сэрца робіць аблічча вясёлым, а калі сэрца сумуе — дух разьбіты.

¹⁴ Сэрца разумнае шукае веданьня, а вусны неразумных жывяцца дурнотаю.

¹⁵ Усе дні прыгнечанага ліхія, а ў каго добра на сэрцы, у таго заўсёды бяседа.

¹⁶ Лепш малое ў страху перад ГОСПАДАМ, чым вялікія скарбы, а з імі трывога.

¹⁷ Лепш крыху гародніны з любоўю, чым тлусты вол з нянавісьцю.

¹⁸ Чалавек гняўлівы выклікае звадкі, а няскоры да гневу супакойвае спрэчку.

¹⁹ Шлях гультая як жываплот з церня, а сьцежка правых — гладкая.

²⁰ Мудры сын — радасьць для бацькі, а дурны чалавек пагарджае маці сваёй.

²¹ Дурасьць — радасьць для невука, а чалавек разумны ідзе простай дарогай.

²² Бяз рады руйнуюцца намеры, а з мноствам дарадцаў яны зьдзяйсьняюцца.

²³ Радуецца чалавек з адказу вуснаў сваіх, і якое добрае слова адпаведнае.

²⁴ Сьцежка жыцьця ў разважлівага [вядзе] ўгару, каб пазьбегнуць адхлані, якая ў доле.

²⁵ ГОСПАД развальвае дом пыхліўцаў, а мяжу ўдавы Ён вызначае.

²⁶ Агіда для ГОСПАДА — думкі бязбожных, а прамовы чыстыя прыемныя [Яму].

²⁷ Нішчыць свой дом сквапны да зыску, а хто ненавідзіць падарункі, будзе жыць.

²⁸ Сэрца праведніка разважае пра адказ, а вусны бязбожнікаў вымаўляюць ліхоту.

²⁹ ГОСПАД далёка ад бязбожнікаў, але малітвы праведных Ён чуе.

³⁰ Сьвятло вачэй радуе сэрца, і добрая вестка ўмацоўвае косткі.

³¹ Вуха, якое слухае дакараньні жыцьця, будзе жыць сярод мудрых.

³² Хто адкідае настаўленьне, грэбуе душою сваёю, а хто слухае дакараньні, здабывае розум.

³³ Страх перад ГОСПАДАМ навучае мудрасьці, і ўпакораньне папераджае славу.