ВЫСЛОЎІ 12 - Біблія (пераклад А.Бокуна)

Разьдзел 12

¹ Хто любіць настаўленьне, любіць веданьне, а хто ненавідзіць дакараньне, той дурань.

² Добры знойдзе ласку ў ГОСПАДА, але чалавека зламыснага Ён асудзіць.

³ Ня будзе стаяць чалавек бязбожнасьцю, а корань праведных не захістаецца.

⁴ Дабрадзейная жонка — карона для мужа свайго, а бессаромная — як гніль у костках ягоных.

⁵ Думкі праведных слушныя, намеры бязбожнікаў падступныя.

⁶ Словы бязбожнікаў цікуюць на кроў, але вусны правых ратуюць іх.

⁷ Паваленыя бязбожнікі, і няма іх, а дом праведных будзе стаяць.

⁸ Хваляць чалавека паводле розуму ягонага, але той, хто мае ліхое сэрца, будзе пагарджаны.

⁹ Лепей быць простым і працаваць на сябе, чым выдаваць сябе за паважнага і ня мець хлеба.

¹⁰ Праведнік рупіцца пра жыцьцё быдла свайго, а нутро бязбожных бязьлітаснае.

¹¹ Хто абрабляе зямлю сваю, той насыціцца хлебам, а хто ганяецца за марнасьцю, той ня мае розуму.

¹² Бязбожнік жадае [злавіць у] пасткі ліхоцьця, а корань праведных прыносіць [плод].

¹³ Ліхадзей заблытаецца праз правіны вуснаў сваіх, а праведнік выйдзе з бяды.

¹⁴ З плоду вуснаў сваіх чалавек насыціцца дабром, і праца рук чалавека зьвернецца да яго.

¹⁵ Шлях неразумнага слушны ў вачах ягоных, але мудры той, хто слухае параду.

¹⁶ Гнеў неразумнага выяўляецца адразу, а разумны хавае зьнявагу.

¹⁷ Хто дыхае праўдаю, той выкажацца праведна, а сьведка фальшывы хлусіць.

¹⁸ Ёсьць такі, што лапоча і раніць, як мечам, а язык мудрага лечыць.

¹⁹ Вусны праўдамоўныя трываць будуць вечна, а язык хлусьлівы — імгненьне.

²⁰ Ашуканства ў сэрцы тых, якія задумляюць ліхоту, а ў тых, якія радзяць мір, — радасьць.

²¹ Не спаткае праведніка нічога благога, а ў бязбожніка будзе поўна няшчасьцяў.

²² Агіда для ГОСПАДА вусны хлусьлівыя, а тыя, што дзейнічаюць сумленна, падабаюцца Яму.

²³ Чалавек разумны прыхоўвае веданьне, а сэрца дурняў абвяшчае глупства.

²⁴ Рука руплівых будзе мець уладу, а нядбайныя будуць даньнікамі.

²⁵ Смутак у сэрцы чалавека прыгнятае яго, а добрае слова разьвяселіць яго.

²⁶ Праведнік мае перавагу над бліжнім сваім, а шлях бязбожнікаў зводзіць іх саміх.

²⁷ Гультай не сьпячэ ўпаляванага, а маёмасьць чалавека руплівага каштоўная.

²⁸ На сьцежцы праведнасьці — жыцьцё, і на шляху яе няма сьмерці.